香港XBOXLive今日開鑼<br>挑戰全球75萬高手

香港XBOXLive今日開鑼
挑戰全球75萬高手

只係得自己一個人打機，覺得單調無新意？等咗好耐嘅XBOX撒手鐧XBOXLive，香港今日終於正式開鑼，以往因網上遊戲OnlineGame而鍾情電腦遊戲嘅機迷，隨着XBOXLive嘅出現，終於可以脫離電腦框框，打通全球Live網絡，直接向全球超過75萬名Live強手挑戰，而且唔少遊戲都可以靠Live下載更新，機迷就可以Keep住有「新」Game玩。

記者：許福合
攝影：陳盛臣　ImageGirl：Fion

今日XBOXLive正式開張，想成為XBOXLive嘅玩家，除咗要擁有XBOX主機外，更要買一套XBOXLive嘅StarterKit（$368），當中包括XBOXLive帳戶、對講聽筒、2個XBOXLive遊戲及12個月費用，就可以上網玩到任何支援XBOXLive嘅遊戲。

多人對戰夠熱鬧
網絡遊戲其實不出兩大元素，多人連線對戰及下載更新遊戲，就以勁Hit嘅賽車遊戲《PGR2》為例，上XBOXLive就可以向世界各地嘅車手挑戰，同時最多8人作賽，加埋XBOXLive會記錄玩分數，可用嚟提升等級或買更強馬力嘅新車，挑戰更強對手，想學嘢又可下載高手嘅「鬼車」練習，玩法變得更多元化，亦有些遊戲甚至可以下載新任務版圖等，有咗Live，遊戲明顯會變得更耐玩。
除此之外，XBOXLive又係一個網絡平台，透過附送對講耳筒，部份遊戲可以支援VoiceChat，對講求合作嘅遊戲如《SplinterCell》就非常好用，即使不在遊戲中，亦可以向其他XBOXLive用家留下15秒留言，當埋IDD用都得，真正玩盡用盡XBOXLive。

■XBOXLive嘅語音系統，可讓玩家一邊打機，一邊傾偈研究對策。

■現時已有唔少遊戲支援XBOXLive，睇盒面頂就可以分辨。
黑機普通版$1,299主機＋手掣
綠光限量版$1,488綠色主機＋手掣＋2款Game

■玩XBOXLive必需配件StarterKit，還提供對講耳筒，只要插入手掣即可使用。StarterKit　$368

■最新版《XBOXLive3.0》可以向其他玩家留言15秒。

■好友專頁內，可睇到朋友係咪上咗Live，並且可展開對話。

十分鐘完成設定
XBOXLive當然最好用寬頻來玩，不過除非你專登申請多一條「專線」嚟玩，否則要電腦同XBOX一齊上網。筆者直駁家中寬頻線落XBOX，輸入IP、帳戶等資料，唔使十分鐘已經成功連線，設定上非常之簡單。若嫌一條寬頻線插嚟插去太麻煩，可考慮加個Router（路由器），設定就等同分享寬頻一樣，可選擇DHCP或自設IP，完全無難度。至於直駁XBOX亦相當簡單，喺網絡設定內，可選擇自動取得IP或以PPPoE登入，完成後即會自動檢查填入資料。
駁好線便要開啟帳戶，過程需要填入個人資料、StarterKit內訂戶代碼、信用卡等，成功後即可登入XBOXLive嘅主頁，開始遊戲。

■XBOX一早已有所準備，機背已設有寬頻線接駁介面。

三大ISP上網優惠
雖然XBOXLive只要上到網就玩得，理論上用邊間ISP都問題不大，不過Microsoft亦有對幾間ISP作網絡測試，保證連線質素及穩定性，隨住XBOXLive啟動，獲得認證嘅ISP最近都推出XBOXLive相關嘅上網優惠計劃：

網上行：升級6M有得玩
選用3M上網計劃（月費$186），只要加$62至$248及簽約18個月即可升級為6M，兼且送埋XBOX主機、LiveStarterKit（包12個月月費）及額外手掣。
查詢電話：28881888

■PPPoE內嘅設定同喺電腦上一樣，需填入帳戶及密碼。

■若用DHCP，IP設定可選自動，否則就當XBOX係部電腦一樣填入選用IP位置即可。

和記寬頻：唔怕撈亂電腦IP
基本月費為$160，加多$38及簽18個月合約，即可升級為多用戶計劃，可讓電腦及XBOX同時享有獨立真IP，還附送3合1遊戲組合（原價$499）、LiveStarterKit（包24個月月費）。
查詢電話：21858238

香港寬頻：送限量版套裝
揀選$188上網計劃，合約期18個月，可獲贈限量版XBOX主機及LiveStarterKit（包12個月月費），總值約$2,000，適合尚未擁有XBOX嘅機迷。
查詢電話：34983498

100個XBOXLive咕𠱸等你攞
今日係香港XBOXLive開鑼嘅大日子，Microsoft專登喺銅鑼灣時代廣場搞咗個「XBOXLive玩串地球決戰時代」，讓各位親身體驗XBOXLive嘅緊張刺激，同時只要拎住今日《蘋果》，再即場回答一條簡單問題，就有機會攞到一個XBOXLive咕𠱸，打機都可以打得舒舒服服。數量只得100個，送完即止。

XBOXLive玩串地球決戰時代
日期：2004年4月29日（四）至5月2日（日）
地點：銅鑼灣時代廣場地下露天廣場

XBOX
客戶服務專線：800964215

5大必玩XBOXLive遊戲
《忍者外傳》
由TECMO推出嘅動作冒險遊戲《忍者外傳》，玩家將扮演忍者高手RyuHayabusa展開各式各樣嘅冒險故事。除咗忍者敵人與怪物魔獸之外，玩家還要面對直升機、坦克車或機關槍，盡情砍殺對手。透過XBOXLive，可以上網對戰及下載新任務。
類型：動作

■《忍者外傳》係單人遊戲，XBOXLive嘅主要作用係下載及更新遊戲。

《ProjectGothamRacing2》
《PGR2》配合XBOXLive，玩家可與朋友或全世界車迷進行街頭賽車大賽。與一般賽車遊戲最大分別，係玩家可以下載「鬼車」或新車，並跟世界上技術最好玩家比賽。多人連線系統支援8個玩家，並且可設定等級限制，與技術相近嘅玩家比賽。
類型：賽車

■設有香港賽道，熟路嘅香港玩家亦較佔優勢吧。

《鐵騎大戰》
《鐵騎大戰》設有對戰模式，最多讓10個人作5對5戰鬥，除咗可以發揮最大攻防能力，更可以更換機甲駕駛，另外亦可交換遊戲取得嘅物品，另外，XBOXLive還支援語音對話，隨XBOXLive套裝附送對講耳機，只要利用控制器上嘅通訊鍵，就可以隨時與隊友商討最新戰情，決定下一步戰略。
類型：射擊

■《鐵騎大戰》係XBOXLive嘅主力之一，可充份發揮Online嘅威力。

《SplinterCell:PandoraTomorrow》
《SplinterCell：PandoraTomorrow》一類嘅第一身遊戲，最正就係最能夠利用XBOXLive嘅Online功能，同電腦上玩一樣，可以上網作多人對戰、分隊作賽等，必玩！
類型：動作＋射擊

■由單機版到Online玩法，都充滿剌激之動作遊戲元素。

《GuiltyGear:XX#Reload》
連格鬥遊戲《GuiltyGearXX#Reload》亦可上Live玩，打個痛快，透過遊戲獨有搜索功能，可以搵出唔同風格嘅對手作賽，此遊戲還支援XBOXLive嘅語音通訊功能，可以一邊打一邊傾偈！
類型：格鬥

■以華麗招式同格鬥技巧而大受歡迎，上網對打肯定剌激得多。