富貴希爾頓姊妹ParisHilton同NickyHilton，喺啲網頁profile度，一個聲稱自己係女演員，一個就話自己係model，但查實淨係見到佢哋喺啲派對度車輪轉咁出現，就知道佢哋冇乜工開啦。
難得有個服裝品牌SamanthaThavasa長用佢哋做代言人，所以佢兩姊妹都好識得飲水思源，久唔久就會着番個品牌啲衫或者啲袋出嚟見人。
ParisHilton同NickyHilton兩個咁富貴，千幾蚊港紙嘅袋仔可能唔會襯佢哋，不過早兩日佢哋幫呢個品牌拍新一季硬照嗰陣，成床擺滿咗五顏六色嘅衫同手袋，佢兩姊妹全程笑容滿面、搔首弄姿，重好professional咁瞬間完成拍攝嘅工作。
原來，佢哋收工之後可以任攞靚衫同靚袋，直情好似擰得幾多得幾多嘅電視遊戲節目一樣！
而Nicky設計嘅一系列Jerry7手袋，聽講都幾受歡迎，連佢家姐Paris都攞咗個！
Hilton兩姊妹風頭咁勁，佢阿媽都唔執輸，Paris早前演出真人騷《TheSimpleLife》後，佢媽咪KathyHilton亦獲邀主持一個《TheGoodLife》嘅真人騷節目，據講Kathy會喺節目度教十個初出茅廬嘅後生女喺社會嘅生存之道，而且每集都foul一個最唔識交際嘅人，夠晒殘忍。