人大常委會扼殺普選，《基本法》45條關注組班大狀近日見親記者都好勞氣，難得噚日梁家傑、湯家驊同吳靄儀心平氣和地同八方行家食飯，梁大狀唔知係咪勞氣得滯，聲都沙埋，湯家驊就輕鬆好多，有講有笑。
講起湯大狀到底選唔選立法會，佢話重要睇同民主派嘅協調，唔好為民建聯留位，選戰排陣要去盡啲。佢話讀中五嘅囝囝好支持爸爸從政，太太只係話「你自己決定啦」，以佢出街食飯點菜嘅經驗，老婆講親呢句話，如果你真係自把自為點菜，肯定點乜嘢菜都會畀老婆鬧，即係話，太太已經心中有數，唔多贊成佢參選。不過湯大狀最後都漏咗句口風：可能要推七月後接嘅案件。講開又講，原來行政會議成員廖長城同公職王鄭慕智，都係湯大狀讀港大法律系時嘅同班同學，不過今日政見南轅北轍。
（圖）湯太對老公應否參政嘅答案係「你自己決定啦」，即是話唔多贊成囉！
傳真︰2623-9278
電郵︰