其實男人同女人一樣咁姿整，好似阿仙奴咁，佢哋為咗令班球員可以成日以靚樣示人，喺其耗資成三億三千萬鎊嘅新球場內，就特登整個美容院。
話說阿仙奴高層問班球員認為新球場要有啲乜嘢特別設施，點知佢哋竟然答話要個美容院。阿仙奴一位職員就咁話：「班球員話如果想喺比賽後去街，就要返屋企梳洗；若然可以喺球場內搞掂埋，咁就慳番好多時間。呢個美容院一應俱全，球員可以喺入面做面膜、水療，甚至剪埋髮都重得。」
或者你會覺得男人老狗使鬼咁姿整，但我求大俠就唔係咁睇。愛美係人嘅本性，男人女人都一樣，所以阿仙奴班球員想扮靚靚，根本冇乜唔妥；況且，佢哋落到場個個都靚靚仔仔，可以令廣大嘅球迷有啲視覺享受，正呀！
意大利一名低組別聯賽嘅中場辛加利斯，準備將佢喺上周末開賽僅三點八秒嘅入球列入世界紀錄。但我求大俠記得，呢個月初英國亦有位低組別聯賽球員，乘風勢造出開賽僅兩秒嘅入球！難為當年喺英國樸茨茅夫踢青年盃賽嘅現役港腳蔣世豪，嗰個最快入球紀錄又一次被打破！
國際足協會長白禮達建議各地聯賽，以後採取和波即射十二碼決勝制。如果呢條新例真係實行，咁阿仙奴今季喺英超聯即將造出嘅全季不敗紀錄，睇怕成絕響囉！佢之前又話世界盃改為兩年一屆、又話女子足球要着上更性感波衫吸引球迷，我求大俠只能送佢兩個字——「屎橋」！
保頓想簽入嘅李華度，已經飛返巴西同佢經理人詳細研究加盟事宜。呢個時候又傳出保頓有新目標，就係今夏勢離開拜仁、三十四歲法國後衞李沙拉素。我求大俠幫佢哋計吓數，連埋隊中嘅佐卡夫，呢支近年喺聯賽中下游浮沉球隊，來季隨時以「老人兵團」出現都唔定。
意大利足總考慮以哥連拿喺禮拜AC對羅馬場波執法。光頭球證今季已經六次執法羅馬嘅比賽，照規矩唔可以吹呢場榜首戰，意足總係怕其他球證唔夠班喎。假如足總真係咁做唔單止做壞規矩，而且其他球證更加難建立信心。再講，人哋係要嘈，搵邊個吹都有噪音。