自命為「一國兩制」總工程師嘅鄧小平果然係先知，佢明知香港人信唔過共產黨，所以喺八四年見港澳人士，拍心口聲稱，就算佢呢啲老頭子死晒，中國對港政策都唔會變，因為聯合聲明內容唔會變，而且中國係「泱泱大國」，講話算數，話五十年不變就不變，不干預就不干預。點知所謂不變嘅，原來係共產黨本性，講話算數，即是講過就算數咁解。
事隔二十年，老鄧嘅接班人派咗一個姓喬嘅工程師嚟，話就話架橋，其實嚟拆特區招牌，當老鄧當年保證冇到，但係好多人重未死，中方欺港人太甚，難怪國際社會睇唔過眼。
有人話，其實共產黨已對港人好優待，據《亞洲華爾街日報》日前報道，有八個北京嘅大學生因為四年前成立一個叫做新青年研究社，開吓會研究吓中國政治改革，結果七個人被控「顛覆罪」，四個目前仍在獄中判八至十年刑，兩個重獲自由。聽到咁嘅古仔，大家係咪好慶幸好彩香港人投胎向南歪少少，喺殖民地出世呢？
傳真︰2623-9278
電郵︰