恒指埋單進帳22點，拉動恒指有最大升幅嘅成份股，係滙控（005），收115.50元，升1格，恒指因此拉高17.9點。窩輪龍虎榜上，排頭位嘅就係1隻滙控Call輪，冧把係9274。
上月26號，滙控個價同昨日一樣，都係115.50元，9274輪價係19.3仙。1個月下來，正股依舊，輪價全非，得番4.5仙，大散77%，原因係隻輪就快末日，溢價收縮。9274昨日大升50%，輪價細，波幅誇張。隻輪溢價2.6%，槓桿率257倍，剩番7日買賣，正股升唔夠2.5元，揸隻輪就會冇渣。
滙控個勢轉番靚啲，4月份港股大跌之後，明日期指結算，5月份有望反彈，滙控有機會帶頭上番，搵Call輪炒，9274並非理想對象，始終時不我與。遠期啲嘅可以諗吓9783，呢件本來交投麻麻，但近日轉熱，成交金額已經打入8大之列，蓋過晒其他滙控Call輪，有37球咁多。講數據，唔錯，輪價84仙，槓桿率13.8倍有爆炸力，溢價2.5%唔高，而壽命則夠長，9月底先至夠鐘。9135數據亦靚，輸蝕在成交唔夠同壽命稍短。
兩隻國內保險股前日散完一輪之後，人保（2328）昨日彈番10仙，國壽（2628）續低兩格。國企指數再跌些少，估計會好番啲，有反彈機會，國壽亦有機會反彈，吼國壽Call輪短炒，可揀9822，9月到期，輪價52仙，溢價9.7%，槓桿率8.8倍。
章盛