四月二十五日，沙田馬場跑「愛彼錶女皇盃」，人頭湧湧，見證「精英大師」打破「同德」嘅十連勝紀錄。「精英大師」果然不負眾望，跑千二米由頭帶到尾，中段力抗「幸福財星」，末段「好望角」與老馬「電子麒麟」已經追唔到。「精英大師」再攞二百五十六萬獎金，加埋「短途三冠王」特別獎金二百萬，即係隻馬跑咗一分零八秒五就為馬主袋咗四百五十六萬，呢隻四歲馬下一季重可以繼續贏，只可惜已經閹咗，否則就身價過億咯。
馬主ArthurAntoniodaSilva夫婦養咗兩隻馬，「精英大師」得二千五百一十八萬，「精明大師」得九百一十三萬，兩隻夾埋為馬主贏咗三千四百三十二萬，收七折淨得二千四百萬元，重未計投注贏錢，恨死唔少馬主。馬主Arthur係港大六五年畢業生，徐詠璇大可搵佢傾吓偈，說佢在港大設立一個「精英大師」獎學金。
當日比Arthur更高興嘅，可能係馬會主席夏佳理，佢自「翠河」之後，未養過好馬，最近幾隻如「濟公」、「李逵」、「悅河」、「豪門伯爵」，戰績都非常麻麻，「駿河」亦係名大於實，點知今鋪爆五十九倍大冷門，為夏主席贏咗「女皇盃」，得獎金八百萬，好似係發夢執銀紙格，笑到主席夫婦見牙唔見眼。主席素來唔喜歡投注落自己隻馬度（因為如果贏咗就有獎金，買嚟做乜），但就喜歡扒冷食全餐，呢鋪怕食到正啩？左丁山托主席鴻福中Q中單T，當主席領獎之時，拍掌拍到手痛，好耐未試過咁高興咯！