到UA時代廣場看某驚慄片的優先特別場，由於尚未正式公映，當晚只得幾間戲院播七點半、九點半兩場，嚟得睇嘅觀眾都係有心人，想自己嚇餐飽或者趁女伴驚餐飽之際攬餐飽。
排隊買爆穀汽水時，身後有幾位操濃烈北方口音的叔叔在交談，相信係自由行嘅旅客，後來得到證實，因為幾位叔叔想用人民幣買爆穀，服務員禮貌地解釋人民幣暫不適用於小食部，幾位叔叔湊乎湊乎，亦夠港錢埋單。
年輕觀眾們頗八卦，細細聲討論點解自由行會咁有癮嚟睇恐怖片？我就知呢，一字咁淺，因為大陸唔准有鬼！請留心，唔係大陸冇鬼，係唔准有鬼。基於無神論於是膽拖無鬼論，所以鬼片一律不獲通過在大陸上映，影碟、影帶當然另作別論，總之如果係真嘅鬼就唔可以在戲院出現。
最近叫做放寬咗啲，驚慄恐怖片都可以獲得通過，例如《古宅心慌慌》及《救命》都可以公映，心理變態、疑神疑鬼、陰森恐怖都得，總之唔可以實牙實齒見到鬼，就算係有鬼，最尾都要加多場主角紮醒一身汗，原來只係發噩夢見到鬼啫。
唔准有鬼，應該係有中國特色的社會主義的其中一項副產品。