二○○四年四月二十六日全國人大常委會以「為香港人好」作藉口，赤裸裸同粗暴地奪去六百萬港人要求更多民主嘅政治權利，上演一場有強權冇公理，先下手為強嘅政治醜劇，正式宣判「一國兩制」死刑，從此香港人再冇甚麼基本法和聯合聲明嘅護身符，任由中央擺布，李柱銘話「港人治港」，一早變成「港人自講」，今次就連「高度自治」都變成「高度自字」，即係鍾意寫乜嘢字就寫乜嘢字，港人重有乜希望。
而前日有去展貿中心以為有得交流嘅朱耀明牧師更餘怒未消，佢話見到在場嘅人阿諛奉承，為中央奪去港人公民權利而鼓掌，感到十分可恥，要問一句「究竟社會公義何存？」佢形容特區政府將沒落，中央官員就詭辯扭曲，由擁護極權嘅中共官員為香港民主立牌指路，就更荒誕。
港人唔會忘記4.26，十五年前同一日，《人民日報》發表咗一篇將學生民主運動定性為「動亂」嘅社論，出重手消滅民主於萌芽階段，不料香港再逢此劫。
傳真︰2623-9278
電郵︰