人大常委會火速否決香港「雙普選」，負責政制發展小組嘅政務司司長曾蔭權話爭取下個月交第三號報告，由於京官決定速戰速決，香港個三人組可能已經搞掂份報告準備五月一號即刻出爐。
不過官場中人話今次應該冇咁快嘞，事關煲呔今日會帶隊考察湛江、陽江，五月一號先返香港，故相信第三份報告最快要下禮拜先公布。煲呔此行由貿發局組織，隨行嘅包括工貿部門官員同商會代表，最奇嘅係政制事務局常任秘書長麥清雄同首席助理秘書長任雅玲都隨行，政制事務局局長林瑞麟喺京官主導政改之下無事忙，睇嚟局中上下亦唔係幾多嘢做，為證明有事可做，惟有隨行幫手招商。
貿發局總裁施祖祥做埋今個月就退休，所以唔會跟大隊，五月一號同記者茶敍話別，其他團員有會過檔房委會新公司嘅蘇慶和，但由於佢未正式上工，故仍以新鴻基執董身份參加，董建華家族公司東方海外（亞太）有限公司董事總經理王德成亦係團員。
傳真︰2623-9278
電郵︰