名嘴鄭經翰早前惹是非，公司被潑紅油後不斷傳出佢又想封咪，近日有消息言之鑿鑿話佢做埋今個星期就「放長假」，九月再見，由商業一台台長梁文道，同另一名嘴李鵬飛接棒，但大班噚日誓神劈願話未封咪住，「梁文道都要實習吓，做得掂咪畀佢做囉。」
大班呢次「封咪」，原因眾說紛紜，有人指佢係受政治壓力，亦有消息話佢另有高就甚至參選立法會，不過佢統統否認，「我唔做電台就返加拿大退休，做電台就只會幫何（佐芝）先生打工。」大班好友則話，早前單潑紅油案件其實重有內情，作案者好明顯係針對大班家人向佢發出警告，令大班不能不認真考慮去留問題。
梁文道對大班去向唔表態，「我冇嘢講，亦唔答任何問題。」梁文道上場後，請咗個研究員每朝「監聽」大班開咪並寫報告，據聞大班對此好不滿，亦係佢毅然封咪嘅導火線。
（圖）大班話佢只會幫何佐芝打工，唔做電台就會退休，若果真嘅話，相信鄭太最開心。
傳真︰2623-9278
電郵︰