戲院通常都係開喺人流旺，交通方便嘅地方，好似旺角同金鐘，咁至多人幫襯，不過，蘭西日前喺鴨脷洲搭巴士，睇見有個廣告，話薄扶林數碼港裏面會有戲院，聽日就開幕，係由百老匯院線經營，可能係新開張，所以票價有優惠，普通位收三十蚊，同線其他影院就要六十皮；而貴賓影院重抵，只係四十皮，蘭西記得銅鑼灣皇室堡嘅戲院要收百二蚊。
數碼港嘅位置比較吊腳，唔係咁多人識去，所以廣告就話埋畀大家知，搭邊線巴士可以去到。當然揸車就唔使咁煩，𠵱家買兩張飛重有三個鐘泊車優惠。嚟自數碼港寫字樓嘅睇戲客源始終有限，估計院商都會打埋隔籬貝沙灣住戶嘅主意，不過就要等吓嘞，因為啱啱開賣有八一一伙嘅第三期南灣，明年底至入伙。
蘭西上網睇過，數碼港百老匯總共有四間戲院，座位總數係七八九個。
近呢一年，電影業好似好番啲，所以快將落成嘅大商場，都話有戲院承租。
講起數碼港，電盈趁推銷南灣之際再贊助藝術文化活動，遲啲會贊助女歌手SarahBrigthman嚟港演唱，男高音莫華倫噚日就去睇南灣示範單位，有興趣買千七呎單位。
樓市呢排好景，唔少人都忙於買樓投資，不過，中原一姐劉瑛琳就走咗去搞第二瓣，進軍養魚業，而且已經有收成攞去賣㖭。
聽講劉一姐用咗十幾萬，喺西貢黃石碼頭投資咗個魚排，養啲高價魚，曾經攞過去賣嘅有青斑同花尾躉。佢經營養魚業，唔知係咪同佢住西貢別墅，因利乘便有關。
一姐除咗公司日常業務外，又中原網頁寫專欄，。
房協喺將軍澳嘅末代夾屋怡心園，趁市旺，蠢蠢欲動重售。風聞房協噚日同區內地產代理開會，交流吓市況，同埋商討吓個盤點賣。雖然未有具體結果，只係收集市場意見，不過，就示意可以預先開始收票，每張本票五萬蚊，代理當然四出撈客。
聽聞，房協想下個禮拜賣樓，但就要視乎收票情況。其實，市場最關注嘅，莫過於價錢，呢個盤重有成千幾個單位，如果比市價平啲，競爭力自然高啲。
九鐵東鐵尖沙嘴線差唔多搞掂，明年尖東人車流會有改善，面貌重會煥然一新，喺嗰區嘅大業主新世界就最受惠啦！聽新世界屬下僑樂服務管理有限公司董事兼集團總經理袁靖罡講，當中亞瑪遜商場會進行大執位，重整租戶組合，將一啲樓層租客搬埋一齊，因為有幾個租客洽租三、四萬方呎，所以要騰出空位。𠵱家商場大租客之一係小熊國。
不過，發展商都會做兩手準備，萬一啲大客傾唔掂時，都可以好快搵到其他細租客填補個場。
預期尖東交通可獲改善，旅發局又搞活動，所以商場即使續約或新租約租金，已經調升咗兩成，明年重有雙位數字嘅升幅。袁靖罡重透露，年前因為環境差而畀優惠啲租客，𠵱家都取消咗。
蘭西
電郵地址：