蚯蚓，樣衰衰滑潺潺，見到即時彈開三尺遠，但有無諗過蚯蚓糞便竟然係最天然嘅有機肥料？香港就有農莊養殖30萬條蚯蚓，攞蚯蚓糞便嚟種植各類有機蔬果，種出嚟嘅農作物，特別新鮮甜美。
記者：陳震霖 攝影：陳陶鈞 模特兒：Blanche、Yoee
個半月前，農莊從南京大學引入50盆約100公斤日本「大平二號」（EiseniaFoetida）蚯蚓，到目前為止已經養殖出300幾盆，如果一次過Show晒出嚟，成30萬條蚯蚓喺你面前躝嚟躝去，都咪話唔惡心；不過惡心還惡心，蚯蚓糞便係最天然嘅有機肥料，莊主揀日本種蚯蚓，就係貪「大平二號」體形細小，但「排糞量」比本地蚯蚓多，可以生產更多有機肥料。
唔講唔知，蚯蚓係有機耕作至寶，原因有三，第一，蚯蚓糞粒為有機農業提供優質肥料，所含氮、磷、鉀、鎂比普通泥土平均高15倍，酸鹼值為中性，保水能力特強；第二，糞粒內嘅細菌能夠將惡臭毒性硫化物分解成無臭氣體，有助清除環境污染；第三，養殖蚯蚓有助翻鬆泥土，方便水份同肥料滲透，令農作更茂盛生長。
兩美少女開始對「大平二號」刮目相看，剷起一嚿濕泥，追問蚯蚓生活習慣，莊主解釋：「佢哋食枯葉、果皮、茶葉渣，鍾意喺濕潤泥土裏面捐窿捐罅，身體滑潺潺，怕光，以蠕動方法前進，食得愈多屙得愈多。」
現時，農莊內大部份田地都用內藏蚯蚓糞粒嘅濕泥種植，理論上唔使施肥，已經種到有益又有營養嘅農作物，Blanche見到大大棵椰菜、紅生菜、士多啤梨，口水都流埋，莊主話：「靚女，講咁多無用，不如整番個有機午餐，試吓用蚯蚓屎種出嚟嘅有機蔬果，係咪特別新鮮有菜味？」素食有機午餐，即割即煮，炒飯、清炒西洋菜、番茄炒青瓜、蘿蔔炒蜜豆、白菜湯，五餸一湯迅即下肚，Yoee食到舔舔脷：「勁好味，同平日街市嗰啲完全唔同，零舍Fresh兼爽口。」
睇完蚯蚓肥料，再睇露天儲水池，農莊有裝置收集山水，山水經自動灑水器，均勻灌溉露天及溫室蔬果。溫室裏面重有部打霧機，打出天然霧水，作用係減低室內溫度同保持蔬果濕潤。忽然有陣陣強風吹過，Blanche問：「做乜無端端開冷氣嘅？」莊主話：「唔係冷氣，我開咗幾把強力抽氣扇，等空氣流通啲，霧水分布得均勻啲。」
離開溫室，兩美少女再參觀露天迷你展覽場，內裏有3部古時收割禾稻嘅機器，莊主介紹：「呢幾部係以前中國發明嘅農業機器，用嚟處理收割好嘅禾穗……」Blanche讀過中史，搶住話：「首先，將禾穗放入打谷機，金黃色穀粒就會喺禾穗裏面跳出嚟，然後將穀粒放入籠谷機，剝開穀粒外殼，最後擲入風車，就可以將外殼同白米完全分開喇。」全中！
本港目前約有2,000戶菜農，其中只有40戶參與漁護署的「有機耕種轉型計劃」，佔有田地約16公頃，面積相等於200個籃球場，但每日平均只生產1.5噸蔬菜，只佔本港食菜量0.01%；為進一步推廣有機種植，政府已撥款近400萬，將由今年9月開始資助本地農戶申請「有機認證標籤」，最快明年初，市場將會有貼上這個標籤的蔬菜出售。
至於香港有機農莊柳莊主，亦率先向南京大學認證中心申請證書，證明農莊裏面所有蔬菜及蚯蚓，全屬有機養殖，證書亦有望在2個月內批出。
根據香港有機資源中心有機生產及加工標準諮詢文件內容顯示，有機蔬菜必須符合以下條件：
1.農藥：禁用化學合成農藥。
2.肥料：禁用化學合成或含基因改造成份肥料，人類排泄物亦不可使用。
3.水源：應使用沒有受污染的水源灌溉，如不受污染的地下水。
4.防污染距離：與可能受污染的農地須有相距不少於2米的緩衝區。
地址：元朗錦田河背水塘
查詢及報名電話：27399786
入場費：包有機午餐每位$65；須專車接載，可於西鐵錦上路站或大欖隧道口上車，每位$80。
交通：元朗市中心或西鐵錦上路站，乘71號專線小巴（$5.5），河背水塘下車徒步30分鐘直達。
