港股噚日一度彈升至12245，但高位有回吐，最終收12154，升幅收窄至22點，成交減少至106億元，反映投資者離場觀望。國企本來晨早升得好好哋，可惜午後芬老趁反彈出貨，國企指數逆市跌0.61%。期交所本月29日調高國企期指合約按金25%，短期將增添國企指數壓力，現在入市撈底真係要三思。
大摩早前叫客盡沽國企股，噚日又預期美國加息1厘，大摩羅奇重話加1厘唔夠，應該加夠兩厘。阿虎唔明點解要加兩厘，不過格老如果真係聽大摩支笛，港股同樓市唔死都一身殘，但阿虎就唔相信美國夠膽狂加息，去打殘美國本土房地產市場。
華大地產（201）先以2.3億元購入北角地皮建酒店，再以3.5億元購西環明珠豪庭酒店，所需資金極多，加上預期就快加息，華大可能需要配股集資，以防利息成本上升。黑客話，華大地產停牌前報6.2仙，現價配股唔化算，加上市況唔就，配股未必有人要。但華大地產主攻三四星酒店業務，路線清晰，加上有自由行概念支持，或有一些中小型基金捧場。
中芯國際（981）一直俾法國佬睇淡，不過在公布首季業績賺2684萬美元後，百記睇番好少少，調高中芯目標價10%至2.36元，但里昂就維持12個月內見1.21元嘅睇法，繼續叫客沽出，理由係此股訴訟纏身兼芯片市場競爭大。中芯上市時，百記料中芯會跌至2.14元水平，結果估中晒，如果今次又估中，即中芯重有約10%水位。
阿虎