新車速報：<br>三菱Colt1.5S換偈揸落好爽

新車速報：
三菱Colt1.5S換偈揸落好爽

繼早前本田代理，引入加有多項配備嘅2004年新版Jazz後，三菱代理亦不甘示弱，引入全新Colt1.5S型號抵港；新車最吸引嘅地方，會係改配一台1.5公升直4MIVEC偈（左圖）後比原有1.3公升型號，起跑加速反應明顯來得更敏捷有勁，用「爽！」來形容之，實在最適合不過。
記者：鄭達基
攝影：陳偉強
ImageGirl：Irene

1.5公升偈更好力
代理為加強Colt嘅競爭力，而特別引入嘅全新1.5S型號，係改以一台1.5公升直4DOHC引擎作骨幹，並有MIVEC技術輔助，因而令其有低耗油量特性（平均耗油量為18.0km/L）外，更有充裕動力輸出，匹配埋一套INVECS-III無段變速CVT自動波，起步加速反應明顯比原有1.3公升型號來得更爽快敏捷。然而，以前輪麥花臣支柱及後輪扭力連桿組成嘅懸掛系統，加埋四輪15吋輪胎嘅輔助，行車循迹性絕能予人十足信心。

多變座艙逐格睇
■兩排座椅皆以雙色配搭示人，而前排乘客席座墊下，更可演化成雜物匣。

■簡潔車廂鋪排，正好切合其小車身份。

■中控台有齊高級音響及恒溫冷氣，操作方便容易。

■獨特表板設計，資料豐富易讀。

■遇有需要時可將後排覆摺起，以增加尾廂載物容量。

$6,000加型仔包圍
其實新抵港嘅Colt1.5S，除咗用上全新引擎配搭外，你亦可為佢加裝一套跑車式包圍（須另外加$6,000），當中包括頭尾泵把連整流器、車身兩側裙腳及車尾定翼等等，加埋四輪15吋跑車合金胎軨嘅配襯下，令車子望落好有一份小跑車Feel；而一組頗有神氣、兼附有鈦金屬裝飾嘅頭燈加原廠霧燈組合，亦能為你於晚間行車時提供十足嘅照明度，從而增添多一份行車安全性㗎！

型爆跑車包圍
■頭泵把加整流器，襯埋附有鈦金屬裝飾嘅頭燈，好型喔！

■車身兩側裝有裙腳，可予人更靠貼地面嘅感覺。

■高置尾翼連煞車燈，既能收穩壓之效又有多一份安全性。

■車尾泵把同樣附有整流器，跑味十足。

ETACS系統帶來方便
雖然座艙看來與原有1.3公升型號相近，但勝在空間闊落，座椅配搭又見靈活多變，同時又可另加$5,000選配真皮座椅；設備方面，除有齊恒溫冷氣、音響等等外，獨有嘅ETACS電子時控與防盜系統，只需帶備多功能遙控車匙，便可遙控電動摺合門邊鏡、防盜警報、自動門鎖及遙控開關車窗，另外附加功能包括若你開車時忘記開啟門邊電鏡，當車速達30km/h時佢就會自動幫你開啟，下雨時間歇式水撥又會因應車速而調節快慢等等，係咪好方便呢？

三菱Colt1.5SProfile
引擎：1468cc直4DOHC
馬力：98ps/6000rpm
扭力：13.5kgm/4250rpm
傳動：INVECS-IIICVT無段變速自動波，前輪驅動
懸掛：（前）麥花臣支柱（後）扭力連桿
制動：（前）透氣碟（後）鼓式（ABS）
輪胎：185/55R15
尺碼：3870×1680×1550mm
軸距：2500mm；車重：1030kg
平均耗油：18.0km/L
新車售價：$132,800（標準版）
車輛提供：環宇汽車（27211111)

■Colt1.5S加有全車跑車式包圍後（須額外加錢），定能迎合年輕車迷口味。


本田Jazz1.3EX
新近抵港嘅2004年新版，不但擁有全新跑車合金胎軨、車身同色頭燈燈座及包圍外，同時又有三款全新車身色供選擇，故此稱佢為Colt1.5S頭號敵人，可謂當之無愧。（$132,880）

豐田Echo1.3
當年憑着一句「小車子、大意思」口號，而進軍本港車壇嘅豐田Echo，多年來都備受用家追捧，因其慳油又實用；但由於已推出多時，加上Facelifted新版沒太大改動，或多或少會予人看膩之感。（自動波：$109,500）

萬事得Mazda21.5
除1.3公升型號外，萬事得亦有為選擇Mazda2嘅用家，提供一台1.5公升引擎作選擇，性能表現明顯要來得更強更勁，屬全新設計嘅賣相及車廂鋪排，亦有一定吸引性。（$119,900）