看恐怖片實在是一個拍拖的好節目。
九成滿的戲院內有九成九是拖友觀眾，一雙一對地分布在每一角落，有些寧可坐在較前較側的位置，確保有絕對的私人依偎空間。
電影未開始，同伴問我：「喂，我不嬲唔睇鬼片個噃，究竟係咪有鬼㗎？」「聽講就淨係講偷腎、搶腎，我要你個腎同埋你唔要我個腎，不過兩個女主角咁索鬼，廣告又冇講明有冇鬼，所以我都唔肯定真係有冇鬼。」我知咁多惟有答咁多，我答嘅途中見到好多其他觀眾都好留心聽我嘅講話，證明佢哋都唔清楚買飛睇嘅係咩戲，只知道有恐怖片，第一時間帶女仔睇。
電影開場，陰森的雨夜配合懸疑的音樂，突然戲院內大部份男觀眾差不多同一時間做同一個動作，大家將單臂撑起，將身軀向女伴一「挨」，女觀眾們入得場都差不多預咗攬住一齊驚，所以便順住個勢，「嚶」的一聲倚入男伴懷內，非常有安全感地睇啲冇安全感嘅戲，真個是冰火五重天，雙料娛樂。我當然照辦煮碗，但單臂提起了良久，同伴仍冇動靜相迎，到了感到手臂有點痠痛，才死死地氣扮攞爆穀食。
心潔與嘉欣實在是不可多得的好演員，難得嘉欣這樣陽光的女孩也透出陰森森的寒氣，心潔的一雙大眼睛像是會說話一樣，淚水一滴一滴數得清清楚楚。
散場時情侶們似已共度了一次患難，大家攬得緊緊的，睇得出有一些應該有下文。我就仍然係攬住杯大爆穀，冇下文。