舊年爆出爛尾樓事件嘅屯門茵翠豪庭，小業主已經入伙，但件事重有啲手尾。鄉議局主席劉皇發舊年五月喺事件風頭火勢時入稟高院，要求確認佢擁有茵翠豪庭五成權益，又向已接管樓盤嘅債權銀行中銀香港追討涉及嘅損失，呢單官司噚日開庭，法庭預咗審四日，點知代表劉皇發嘅律師一開波就話唔再追，單官司就咁了結。
其實發叔搞咗差唔多一年，律師費都唔少，呢單官司一度令到小業主收樓有阻滯，點知兜兜轉轉，最後佢竟然放棄。但點都好，起碼令小業主放下心頭大石，因為如果發叔勝訴，小業主單位嘅業權可能會有問題。冇咗呢單官司，八方相信發叔可安心搞立法會選舉，近期傳出話佢唔會喺鄉議局連任，可能改去參加區議會功能界別選舉，發叔都係要時間要諗吓嘞。
傳真︰2623-9278
電郵︰