政改爭拗加沙士疫情，成為淡友手上兩件「大殺傷力武器」，港股又再散過，恒指大跌2%，國指更下瀉5.7%，好友冇啖好食。秋官套劇雖已播完，淡友依然咁惡。
市況如此，Call輪梗係冇運行，唔見十幾個巴仙已經算係跌得少。不過，大市唔會直線咁升，亦唔會直線咁落；升得多自然會跌，跌得多自然會升，恒指由高位跌落嚟，蒸發咗2千點，遲早彈1鋪勁。
昨日講過滙控（005）、和黃（013）嘅日線圖，均出現利好之底背馳，其實長實（001）、中移動（941）同新地（016）等大隻藍籌亦然，恒指自然亦係。大市昨日雖跌，背馳並未破壞，除非續有大壞消息，短期反彈機會甚高。
恒指再跌空間未必太多，11900至12000應可守穩，到位可再博Call輪，注碼依然係宜細不宜大，寧可見走勢對辦先至加碼。
昨日提過之滙控同和黃Call輪，仍可吼位收集。想賭大市回升，揀恒指Call輪玩，宜揀價內同年期較長者，取其風險較低，對象係9788，現價12.6仙，9月28日到期，行使價12000點，溢價4.9%，槓桿率16.7倍。另1選擇係9799，同日到期，溢價4.3%，槓桿率14.3倍。
章盛