甲級寫字樓售價急升，惹嚟唔少投資者短線炒賣，在成交期前轉手嘅摸貨又見增加。聽屋之島董事總經理黃志強講，港島八幢由散業主持有嘅甲級商廈，屬於摸貨嘅放盤有二十六宗，最多係金鐘力寶中心，佔咗十宗，約四成。
力寶中心喺九七年嗰陣係當紅炒盤，估唔到今時今日仍然係炒家最愛，黃志強話原因係力寶供應多，又有細單位，樓齡唔算舊，所以吸引炒家。力寶中心三十二個放盤，炒盤佔十個，都算厲害，炒家叫價五千九至六千，比業主盤高。
至於上環信德中心同招商局大廈，有七宗。而皇后大道中九號就有一兩宗。
五．一黃金周嘅檔期，地產代理好重視，美聯就睇準內地客會嚟香港旅遊兼買樓，執行董事張錦成話，佢哋喺香港買住宅、商舖、工貿及商廈等物業，都可以獲贈足金，重預備咗五十一両黃金送畀啲客，先到先得。
至於中原地產，會參加五月一號至五號嘅深圳房地產春交會。中原執行董事陳永傑話，會帶埋二十五個香港樓盤嘅資料，準備上去做路演，重會設計「香港自由行睇樓團」報名處，等黃金周之後，先安排有興趣嘅準買家嚟香港睇樓。
打算喺下個月開賣嘅太子道西栢德豪廷，九龍建業夥同渣打銀行搞優惠，今個禮拜六先開放畀渣打銀行五千個客戶參觀。
透過渣打銀行承按，可獲英倫旅遊優惠，下個月十五日前申請九成樓揭，有五百蚊現金禮券，重有汽車貸款優惠，例如三百蚊免費入油同訂雜誌優惠。
九建市務及銷售總經理羅汝榮話，豪宅重有上升動力，呢個盤嘅分層單位呎價約六千，與同類物業市價重有一成半折讓，故此唔擔心銷路。
新鴻基地產嘅土瓜灣農圃道十八號，想發展成有代表性又富有時代感嘅豪宅，趁物業即將開賣，發展商先向傳媒介紹物業嘅設計風格。設計師梁志天話，呢個用BoutiqueApartment做設計嘅豪宅，用咗既古典又現代嘅簡約設計元素。加上，物業主要對象係大都會嘅客群，對居住講求獨特性，有設計品味，所以會嘗試跳出傳統框框，顯出獨特個性。
例如會所大堂會用簡單嘅線條，外牆用上較年輕嘅銀灰及白色。對於呢種將新舊元素，傳統及現代融合，對比中見和諧嘅設計風格，梁志天就用「牛仔褲配禮服」嚟形容。
呢幢樓高四十八層嘅住宅，提供三百二十個單位，其中六個係特色單位，重有四十套超過一千二百呎，可自行打通嘅相連單位。
蘭西
電郵地址：
