內地沙士疫情擴散，令到港股反彈又煙消雲散，恒指一度大跌近300點，最低潮之時啱啱就落番上周四的12901低位，收市12132，跌251點，成交縮到132億元。期指個勢好弱，現貨月低水23點，5月期更大低水137點。
港股連升11個月，到3月先掉頭回落，恒指由14058落到暫時嘅低位12091，共下跌1967點，幅度成14%，理論上係會有一次技術性反彈，本來上周五已凝聚了反彈嘅力度，但噚日又再散過，沙士只係理由之一，實際上，期指結算先係真正嘅原因。
個人認為，大市跌咗成2000點，一次較大幅度的反彈，始終會出現。恒指在12000水平應該有好強支持力，但唔排除今次跌市，恒指會「穿一穿」先出現反彈。家下好多隻大藍籌，包括滙控（005）、中移動（941）、長實（001）同和黃（013）等，都已經出現背馳，恒指亦一樣，若呢一兩日再插多一插，反彈嘅條件將更為成熟。去年11月底，恒指在11889至11944有一個上升裂口，在今次跌市中未必會補回。
今次反彈，恒指照計可升600至700點，樂觀點看，有機會上到50日線，即係13000水平，時間大約可維持兩至三個禮拜，5月下旬之後，大市會再尋底。因此，若然內地沙士疫情唔再惡化，短期策略係博反彈，到高位獲利回吐後，可以再等機會，到6月調整低位時再入市，迎接下半年另一個大升浪，恒指在年底有機會上升到16000至18000。
至於6月的調整低位在哪一個水平，估計12000大關會失守，恒指有機會落到250日平均線（約在11600水平），到時候，千祈唔好錯失呢個大好入市嘅機會。
國企幾隻大成份股同原料股繼續被糟質，國指最低潮時曾落到4216，大跌287點，跌幅6.3%，收市上番4248，都大跌255點，睇盤路，好多都係大行出出入入，唔多見散戶參與。國企調整時間較長，由1月開始已有成4個月，短期走勢有機會形成小雙底，反彈阻力在4500點水平。
郭兆誠