娛樂圈一向好現實，唔少藝人表面上好隨和冇乜架子，但實質天生一對白鴿眼，就連啱啱升咗做無綫總經理嘅陳志雲，原來亦曾慘遭藝人白鴿眼對待！
馮仁昭個老友最近提起一件發生喺陳志雲身上嘅趣事，話說陳志雲早年重係做緊助理總經理嘅時候，曾經用過韋家晴呢個藝名幫香港電台做節目，而佢每次請嘉賓做電台訪問，都會用番港台DJ韋家晴個身份。有次佢搵電視台一位當紅小生做訪問，點知call極嗰位小生都唔覆機，到兩個幾星期之後，嗰位小生覆機嗰陣，小生又話自己點忙點忙扮晒大牌，激到陳志雲死死吓。
原來，嗰位當紅小生以為韋家晴只係電台一個小小嘅DJ，所以扮大牌遲成兩個星期先至覆人哋，點知佢上到去電台見到韋家晴廬山真面目之後，先至知道自己有眼不識泰山，但再點擦鞋都無補於事！
甄妮同寰宇集團嘅錢銀爭拗到𠵱家重未平息，噚日林小明太太接受商台電話訪問，雖然甄妮喺上個禮拜話寰宇攞到證據出嚟就會斟茶認錯，林太亦話會接受道歉。但林太就唔多信咁話：「我都唔係好相信，因為甄妮呢個人好鍾意講過啲嘢唔認嘅。其實佢（甄妮）係咪玩大咗，到𠵱家又縮沙？」
薛家燕日前拍攝咗首新歌《乜都盞》MV，家燕姐坐喺巴士同電車上遊港九鬧巿，又一邊跳舞，吸引不少自由行旅客圍觀，家燕姐話：「首歌都係唱好香港嘅，希望會帶旺嚟緊嘅黃金周，自由行好熱情」
無綫本來以為用一對八十年代黃金組合汪明荃、鄭少秋合作，收視可望突破新高，可惜在最新一個收視報告入面，劇集《血薦軒轅》播出最後一個星期，平均收視再下跌一點，只有二十九點，有一百八十七萬人次收睇，幸好周六大結局，錄得最高收視三十七點，有二百三十九萬人次，都算好彩唔使爛尾，秋官、阿姐可以鬆口氣。
陳敏之同胡杏兒噚日一齊接受新城電台訪問，順便為佢哋主演嘅劇集《下一站彩虹》宣傳。《下》劇噚晚首播，所以佢哋兩個心情十分緊張，尤其係首次擔正做女主角嘅陳敏之，佢話：「我要開工所以睇唔到，但我媽咪已經買咗十幾盒錄影帶，叫定細佬幫我錄。」
瑪利亞（肥媽）噚日喺中環宣傳「蘭桂坊美食節」，介紹食咗唔會肥嘅餸，重同大廚Jason示範煮味七彩牛柳卷。
本來有二百幾磅嘅肥媽，做咗纖體代言人後，三個月減咗五十八磅，人瘦咗但個胸就冇細過，搞到佢個孫仔指住佢個胸叫波波，肥媽重諗住七月出本教人減肥嘅食譜。
蕭正楠（Edwin）噚日去新城接受訪問，佢話前排去咗日本六日拍音樂特輯，不過個導演就好嚴厲，而且重一早講明拍攝時間之內唔可以偷走出去shopping，所以Edwin頭五日都係不停做嘢。好彩最尾一日大家都有五、六個鐘去瘋狂購物，Edwin亦都喺幾個鐘頭內狂風掃落葉咁使咗兩、三萬。
