人大釋法終於開始，原來得個神枱桔，二○○七年冇普選，二○○八年功能組別同直選議員各佔一半，即是選舉方式，原地踏步，所謂循序漸進，即是「因循落序，不得漸進」嘅簡稱，擺明搵老襯。
咁樣釋完法，再將個波掟番畀特區政府。中方定死框框，咁民主參與有冇得擴大呢？絕對有！不過，除非董曾向國際級政治家肥彭學習，以肥彭當年嘅政制改革方案為師，以非凡智慧，同埋莫大勇氣，可以照樣保留二○○七年特首繼續由八百人選舉委員會產生，嗰八百人，就另行劃界分配，擴大各人嘅選民基礎，搞到全港七十二行，包括殯儀館嘅堂倌，歌連臣角火葬場嘅㩒掣員，選出選舉委員會裏面嘅殯儀民主之星，亦即係搞到最終人人都可以投票，選出呢八百個真正嘅民意代表，令到選舉委員會八百人，由一堆木口木面嘅秦俑，變為八百個有獨立思考判斷，又有血有肉嘅真人。
二百票可以自由提名，若然任由香港永久居民中嘅陳方安生、李柱銘等人報名參選，同鄔維庸、梁振英等人一齊候選，咁○七特首，即使照樣由一個選舉委員會產生，由八百名舉手機器，進化為八百個有尊嚴嘅人來投票，香港人一樣會心服口服！
但實情會唔會係咁？睇吓第二屆嘅特首「選舉」幾肉酸就知！七百幾人提名阿董「候選」連任，根本連「投票」都慳番。呢七百幾人，就係一班秦始皇嘅兵馬俑，睇唔到、聽唔見、冇思想、冇生命，佢哋嘅職責，就係個個一碌木咁戙喺處，同秦始皇守皇陵！
喬曉陽口口聲聲「循序漸進」，咁請問喬曉陽先生：一九九七年特首選舉，尚有董建華、吳光正、楊鐵樑、李福善四名「候選人」一齊「均衡參與」，點解五年之後，只剩番董建華一個人「候選」，並且選都唔使選就「當選」？由四個候選人「循序漸進」為一個候選人，四減三等於幾多？咁係「循序漸進」定係「循序大退」？
由二○○二年選委會嘅鬧劇，即時可以拆穿呢場搵老襯嘅把戲。除非全港民意強烈要求特區政府改革八百人選舉委員會嘅組成、八百人產生嘅辦法，否則○七普選，即是一場騙局。
至於○八立法會，維持功能及直選各佔一半，亦更加係話到明，冇得郁。不過唔怕，港人亦有得走盞，可以要求董曾將立法會議席，由六十席增至一百二十席，功能同直選，大家六十對六十，功能組別，亦可以大為增加，連性工作者、同性戀組織、殘疾人士等都各有一席，咁就會連金雞吳君如、Tommy仔陳諾爾，同埋前日喺維園慘遭親中維園阿伯辱罵為「死盲鬼」嘅莊陳友，都一樣入到立法會，民主唔會倒退！
正所謂上有政策，下有對策，唔怕人大常委會精，最怕特區政府呆，好似葉國華話頭：港人未至絕望，重有得爭取，只睇吓特區政府嘅決策人有冇人想做記錄在案嘅港奸？
傳真︰2623-9278
電郵︰