日前，筆者曾經提及過，本田代理特意響馬可孛羅香港酒店，搞咗個全新Odyssey嘅PrivateLaunchParty，由於當天（周日）代理只邀請一班有潛質嘅VIP貴客到臨參觀，筆者本以為到場人數有限而已，殊不知當天下午筆者現場所見，賓客川流不息之餘，重不時將部Odyssey新車圍得密不透風呢！
至於快將於5月下旬正式登場嘅Odyssey車系，會劃分有豪華（Prestige）同尊貴（Supreme）兩個版本，既有齊三排真皮椅，又有左右獨立恒溫冷氣、6+1高級CD音響、原廠霧燈、高置尾定翼，還有16吋合金胎軨，以及車廂桃木裝飾等配搭。然而，頂級Supreme版重追加有前後6個安全氣袋連充氣簾幕，重有尾排椅電摺功能、電天窗、Xenon頭燈等裝備㗎！前者Prestige版定價不過$289,880，而後者Supreme版賣價亦只係$319,880而已；聽聞預展當日代理經已收過八十部定單，預期下個月尾Odyssey新車系正式販賣前，銷量會超越二百大關都唔定，今勻麥Sir真係飲得杯落喇！
記者：陳偉林