小初上周末講過擔心德昌電機（179）公布盈利警告後，股價會有好大反應，果然德昌噚日一早就低開，最低見6.60元，收6.70元，勁跌19.3%，成交金額高達7.29億元，就知芬佬真係洗緊倉。
成班分析員好似怕隻股唔死得，繼續踏多兩腳，將德昌目標價一再調低。經紀黃話，雖然芬佬似乎反應過激，但市場氣氛咁差，所以點都要跟紅頂白，德昌短期都係唔好亂掂。
另外，小初一早就唔睇好嘅利福國際（1212），噚日終於跌破8.30元招股價，跌6.9%，收8.15元，成交股數有902萬股，金額7497萬元。
經紀黃話，雖然有部份芬佬對利福嘅零售概念，同埋大股東背景有所憧憬，但最終都係要面對現實，市況差就要減持。其實幕後人已經交足功課，上市以來頂足咁多日，最高重見過9.10元，如果當時唔沽貨獲利，就唔好怨人。
事實上，在超額配股權呢隻「綠鞋」都行使埋之後，人哋實在搵唔到理由要逆市力頂。
慕容小初