餐廳羅來電，大聲抗議有線電視唔播NBA季後賽，萬眾矚目，全中國都睇住嘅奧尼爾大戰姚明，香港竟然冇得睇，另外帝王對小牛又係緊張刺激，香港又冇。餐廳羅話：「有線識得收月費，NBA最重要時刻，居然冇嘢睇，點對得住我哋，你幫我鬧衰佢！」
記憶所及，好似前幾年嘅NBA季後賽第一輪，香港都係冇直播轉播嘅喎，點解呢？打電話問肥陳，要求解釋。肥陳話：「千祈唔好誤會呀，ESPN有乜，我哋就播乜，絕不抽起，我哋好對得住觀眾嘅，可能ESPN冇季後賽第一輪嘅香港播映權啩。」肥陳係有線權威消息人士，佢既然咁講，惟有有聞必錄。不過到咗上星期六，直播湖人大戰火箭，餐廳羅條氣順番晒。
講完電話，朋友送嚟一本台灣《壹週刊》，一個封面係章子怡與霍啟山（朱玲玲嘅寶貝兒子，二十歲）在LV派對上熱辣辣的故事，狗仔隊居然影到章子怡次日喺電器舖踎喺地上嘅架式，令我哋眼界大開。另一個故事講呂秀蓮與隨扈（即隨從）到高級山區別墅小休七天，自己住一間屋，隨從住二十間房，七日租金共十二萬六千台幣（約港紙二萬九千八百元），邊個畀呀？總統府發言人黃志芳話呂秀蓮住別墅（華城潤泰）係「朋友招待」，隨從費用由公帑支付。
德國央行總裁一家人喺二○○○年除夕入住柏林五星酒店，由捷能銀行招呼，前一輪由《明鏡周刊》爆出嚟，現在已經辭職。呂秀蓮唔使遮遮掩掩，公然帶大隊入住「潤泰集團」嘅度假別墅，受財主招待，竟然若無其事，實在全無「利益衝突」嘅意識，水平低到痹。