阿仙奴順利奪今屆英超聯冠軍，真係恭喜晒！不過，聯賽第四位（即下屆歐冠盃最後一個參賽席位）就爭得好激烈。雖然博彩公司就列咗同第四嘅利物浦同分，但少踢一場嘅紐卡素做「四哥」大熱，但係紐記喺星期日對車路士場英超聯，有中堅活基治勇戰傷大髀，要提早「收咧」，肯定有暗湧。
係人都知，紐記今屆後防人腳普通，特別係中堅嘅巴布爾，表現真係好得人驚；如果唔係活基治成日救駕，紐記未必有咁好成績。由於紐記之前已有比拿美及真拿斯受傷，𠵱家連活基治都冇埋，重有奧拜恩即將停賽，難怪領隊老笠話係重大打擊。不過，我求大俠就好想紐記有得踢歐冠盃，佢哋鬥志好過利記，人腳又好過維拉，點都有睇頭啲。
巴塞件古華特贏皇馬時，入替僅一分多啲，第二次觸球就頂入，為球隊追成一比一，算係幾叻仔，之不過細哨後來出個靚波畀佢，佢無人看管下竟頂高；或者可以賴唔係成日落場比賽，但我求大俠想話畀波友知，呢個就係古華特，永遠飄忽，唔係入咗先，可能已經又做敗家仔。
西甲前列鬥到七彩，榜末何嘗唔係？呢周要搶分嘅愛斯賓奴、切爾達、馬略卡同阿爾巴塞特都贏波贏盤，篤定降班嘅梅西亞輸畀維拉利爾，但喺亞洲盤都係走盤，搞到華拉度列同桑坦德就跌晒落嚟，我求大俠心諗，季尾捧搶分球隊真係坐和望贏咁款，唔通下次華、桑兩軍都有計？
曼聯今屆不利新聞一單接一單。據英國報章報道，紅魔前鋒雲尼斯達羅上星期五練波時同貝利安吵嘢，要教練費倫分開佢哋。由於今次係雲佬唔啱，費倫叫佢道歉，佢竟拂袖而去，到上周六作客利物浦時，就話有傷冇到場。如果雲佬再唔收火嘅話，恐怕佢喺曼聯前途都係咁先。
費倫天拿前晚主場砌低榜首分子麥斯納後，升上意乙榜第六位，印象中係呢支紫衣大軍今季首次去到呢個有權爭升班嘅排名，認真巴閉。查實最近已經有傳費倫會方高層籌備緊升班後嘅組軍大計，鬼火咁有信心，重盛傳會邀好多過氣名將，包括巴迪斯圖達回巢㖭，係就熱鬧啦。