沙士、宏觀調控兼息口預期向上，港股真係冇運行。期指淡友當然趁勢發難，港股在外圍表現唔算差情況下，全日大跌251點，收報12132，成交132億元。國企股果然低處未算低，江西銅（358）、鞍鋼（347）同馬鋼（323）勁挫逾10%。
不過，國企股嘅跌幅唔夠德昌（179）誇張，公司因鋼價及銅價上升而發盈警後，股份遭洗倉，勁挫19.3%，收6.70元，成交高達7.3億元。其實過去一年銅鋼價格大升，大家有目共睹，分析員點會今時今日才知銅價及鋼價一年升30%，而對德昌發盈警感到意外呢？
黑客話，企業一般都可以透過買賣期貨合約鎖定成本，今次德昌遭拋售，好大程度係因為分析員估唔到德昌管理層未能控制到銅鋼原料成本，芬佬因而懷疑公司的「透明度」。
之前講過炒家收集自由行概念股，準備五一黃金周大炒，點知臨門一腳殺出個沙士來，據聞有關炒家皆無心戀戰，恒豐金（870）挫4.9%、莎莎（178）挫4.8%、南航（1055）挫4.8%、富豪酒店（078）亦挫5.2%，唔知羅旭瑞會否仍然賠定以保留富豪東方呢？利福國際（1212）噚日跌破招股價，收報8.15元，跌6.9%，今次連百記都頂唔住。
天地數碼（500）傳出引入摩托羅拉做大股東，每股作價1元，較停牌前報價大幅折讓逾50%。Cookie話單料好堅，但阿虎重好記得東方燃氣（432）同和記環電（757）嘅教訓。
高寶綠色（274）公布純利倒退37%後，股價噚日急挫21%，收0.93元，成交2565萬元，據聞可能有斬倉貨出街。
阿虎