英國男星曉格蘭特（HughGrant），自從同伊莉莎伯凱莉（ElizabethHurley）結束十三年感情之後，大大話話都同成十個靚女女星傳過緋聞。不過近日有傳曉格蘭特秘密搭上教佢玩高爾夫球嘅蘇格蘭大師蒙哥馬利（ColinMontgomerie）個老婆艾妮美亞（Elimear）。嘩！今次曉格蘭特即係搞師母啫！
其實曉格蘭特同凱莉分咗手後，突然間沉迷高球，佢之後重拜蒙哥馬利為師，大家得閒都有切磋吓球技。不過喺呢排蒙哥馬利同結婚十四年嘅艾妮美亞嗌大交，感情出現危機，估唔到平時同艾妮美亞幾啱傾嘅曉格蘭特，嚟一招乘人之危，之後連師母都搶埋，連我羅拉都跌晒眼鏡。
其實現年三十四歲嘅艾妮美亞，已經幫蒙哥馬利生咗三條化骨龍，不過蒙哥馬利成日都要去世界各地比賽，難怪曉格蘭特可以乘虛而入。喺收到呢單消息後，有記者第一時間打去問艾妮美亞，點知佢話唔方便評論喎。我羅拉好好奇，唔知蒙哥馬利收到呢單消息後，重會唔會同曉格蘭特有friend做呢？