因容許香港「武」警武力驅趕和平請願學生嘅一哥李明逵，被一班睇唔過眼嘅中大校友冠以「中大之恥」之名，不過佢母校好為呢個「威水校友」着想，諗到一條絕橋為佢洗去恥辱，就係喺下個月中頒個中大式「荷蘭水蓋」──第三屆「榮譽院士」名銜畀佢，等佢可以畀光榮照一照。
八方知道得到呢個榮譽嘅人，係要對中大有一番貢獻先得，所以攞得呢個榮譽，肯定唔會係中大之恥，睇怕一哥實沐浴齋戒一番去攞獎。
李一哥嘅手下早排先郁過和平請願嘅學生，佢攞獎嗰日恐怕實會有中大學生為佢「助興」，佢可能都要帶定班香港「武」警嚟傍身。
本身係中大校董嘅立法會議員張文光話，一哥自從回歸日嘅貝多芬事件，至本月初政府總部武力清場事件，都顯得佢唔贊同民主、學生運動，同中大嘅信念好唔同，所以佢話會要求中大交代頒獎畀一哥嘅原因。
警務處處長李明逵
消委會總幹事陳黃穗
恒隆集團董事會榮休主席陳曾燾
東亞銀行董事兼副行政總裁彭玉榮
中大生物系前任教授容拱興
建築界人士JohnNelsonTarn（助中大成立建築系）
資料來源：中大
（圖）李一哥被喻為「中大之恥」都有獎攞。
傳真︰2623-9278
電郵︰