經過上周五反彈，大市氣氛好番多少，恒指短期應該重有上升空間。不過，大家博反彈之時，一定要留意內地沙士疫情，若見勢色唔對，就要跳車，切勿猶豫。
滙控（005）下周二宣布派第1次中期息，對股價會有穩定作用。從技術上睇，滙控日線圖同周線圖，9RSI都出現底背馳，短線有機會繼續反彈，升幅可望有兩三蚊。
搵滙控Call輪短炒，最抵玩始終係9135，現價73仙，玩到6月尾，溢價只係1.1%，槓桿率有15.9倍，交投雖然唔算好旺，但𠵱家只適宜細細注，應該足夠轉身。
鍾意刺激可以諗吓9173，溢價5.3%係貴啲，槓桿率55.5倍夠吸引，7月19日屆滿，重有時間。9157數據靚啲，3.1%溢價，74.8倍槓桿率，但6月1日期滿，末日輪必然大上大落，未必人人啱玩。
和黃（013）日線圖嘅9RSI同MACD，亦見底背馳，和黃Call輪亦可搵啲嚟短炒。正路選擇係9058，壽命去到7月2日，溢價4.7%，槓桿率23.8倍。搏殺嘅可以考慮9365，玩到8月6日，溢價15.5%，槓桿率44.5倍。𠵱家炒Call輪，記住只係博反彈，正股若開市就扯上，千祈咪高追。
章盛