雖然秋官套電視劇在上周末大結局，但沙士在國內重現，而最大件事係美國加息陰影揮之不去，大市似乎都係易跌難升。經紀陳更話，就算大市今日再升，都係未補完空倉之故。
呢排大跌市中，亦有部份股票企都硬一硬，其中一隻就係上市以來都冇乜聲氣嘅超級冷門股嘉輝化工（582）。經紀陳話，隻股因為派息夠勁，成功「息誘」到個別機構投資者。
當然，嘉輝貨源疏落，搞手後台夠硬淨，亦係股價企硬嘅主要原因。嘉輝上周五升3.2%，收1.28元，比起52周高位1.33元，只係略為低少少，似乎大市波動對佢全無影響。
嘉輝主業產銷工業塗料，上個月中公布2003年度業績，盈利5058萬元，比舊年上升38%，派末期息每股0.03元及特別股息每股0.03元，以上周五收市價1.28元計，PE6.34倍，周息率7.03厘，睇落確係好吸引。
經紀陳話，嘉輝大股東係馬來西亞上市公司，所以比較低調。
慕容小初