美國女歌手BritneySpears，自從年初傳出單結婚鬧劇之後，一直俾人笑到面黃。我羅拉其實好體諒佢壓力好大，不過據講Britney一唔開心或者緊張起上嚟，最鍾意咬手指腳趾嚟減壓，冇錯，的確係腳趾，齋聽都覺得高難度啦！
一位專幫Britney修甲嘅美容師，最近接受電視節目訪問，佢話幫Britney修甲簡直係一個噩夢，點解？原來Britney成日都將啲手指腳趾咬到爛晒，神仙都難救。
最近Britney上去名嘴JayLeno個節目度，首度將佢爛溶溶嘅腳趾公開，連佢腳上面嘅兩個紋身都睇得一清二楚。Britney話：「我覺得我嘅腳趾好核突，啲紋身好失敗。」
另外，雖然Britney嘅氣勢大不如前，不過美國好多女仔依然視Britney為對象。繼早前一位男士為咗籮霸珍妮花洛庇絲（JenniferLopez）走去變性後，一位來自佛羅里達州嘅Britney超級歌迷美亞（Mia），早前為咗學Britney，特登去咗去隆胸，𠵱家佢嘅上圍由34B升cup至34D，扮起Britney跳舞，真係真假難分。
此外，Britney日前俾人見到同一名貌似Justin嘅新歡喺沙灘嬉戲，而根據佢本書改編而成嘅電視電影《BraveNewGirl》已經首播，不過評語就唔多好喇，咁睇嚟Britney啲手指腳趾有排爛喇！