曾志偉同導演黃精甫前晚去咗港台接受節目《電影兩面睇》訪問，宣傳本周四上映嘅新片《江湖》，呢套戲之前送咗去內地審批，因為劇情以「江湖」做題材，意識大膽，據聞因此喺內地上唔到，但身為監製嘅志偉一直冇放棄，連日嚟不停周旋希望可獲解封。
志偉為咗《江》片審批順利，佢話：「因為內地有淨化青年標準，所以之前《江》片先唔批，我哋於是喺套戲度加咗警察片段同對白，我今晚（即前晚）會攞返去，最快周一（即今日）就可以知道結果。希望可以趕及喺五．一勞動節黃金檔期上映，我預咗有四條院線，希望可以有過億票房，開創港產片嘅佳績。」
《江湖》今晚喺銅鑼灣時代廣場舉行首映，由於部戲入面有好多淋雨戲，電影公司為咗想傳媒同嘉賓感受一吓淋雨嘅滋味，於是諗住喺今晚首映灑水，但馮仁昭覺得呢樣嘢唔做好過，事關記者咁多攝影器材，淋壞咗唔通電影公司賠咩！
另方面，成龍早前評論台灣總統選舉，近日俾台灣一名立委呼籲抵制佢，志偉力撐好友話：「佢都係講出外國人嘅睇法，出於關心一件事，係對一件事，應該唔會禍及香港。」
劉德華同張學友演出嘅黑幫片《江湖》暫時唔可以喺內地上，但同係黑幫片，由張耀揚同柯受良（小黑）演出嘅《兄弟》內地就已經攞咗准映證，六月會喺香港做，跟住台灣都安排上，片商重決定台灣嘅版權收益捐畀小黑嘅家人。其實呢部戲原本安排再早啲上嘅，但搞咗好耐，到下個月嘅五一勞動節黃金周喺內地先可以上，真係唔明內地嘅評審準則，既然兩部都係黑幫片，點解審查標準會唔同。
林曉峰（阿Lo）前排曾經批評無綫而被口頭警告，佢噚日出席記者會時好開心咁同記者講呢件事已經雨過天青，佢重好抵死咁話：「冇事就好囉，等我唞一排等風聲冇咁緊先至再出嚟。」
不過佢事後就好多謝無綫原諒佢，而且覺得對方因為知道佢喺呢個艱難時勢有兩個細路仔，所以保住佢個飯碗。
F4前晚同蔡依林、周杰倫由約旦拍完汽水廣告返台灣，大批F4歌迷喺機場等候。至於緋聞情侶蔡依林同周杰倫就前後腳出機場，有人問蔡依林早排喺新加坡宣傳時，係咪用咗成萬蚊港幣嘅長途電話費同周杰倫㷛電話粥，蔡依林只笑笑口話唔記得。
葉蒨文前晚喺馬來西亞雲頂開演唱會，黃耀明做表演嘉賓，觀眾反應好熱烈，唱到中途，葉蒨文跳到瞓喺地，現場嘅燈光亦暗咗落嚟，呢個時候，有個女歌迷衝上台錫咗佢一啖，之後葉蒨文講笑話：「頭先係咪有人錫我，好彩係個女人，冇蝕底。」
