豪宅市況有支持，發展商都願意畀多啲錢去執靚個盤，提高樓盤格調同質素。好似新世界見早前西半山柏道2號喺一兩日間清袋，價錢重超理想，就立即將同區般咸道11號嘅用料越級提升。
聽新世界黃浩賢講，幢樓由地下大堂至每個單位都有好多改動，除地下大堂加咗好多ArtDeco裝飾外，泳池同停車場入口等都有。而住宅單位大門由原本一扇門，改為子母大門，地板由地磚轉用令冷縮熱脹減至最低嘅預先打磨木地板，又將露台地磚改用麻石等。
他透露，加錢最多係每層嘅電梯大堂，每層多用超過十萬蚊，務求打造星級酒店大堂設計水準，如掛水晶吊燈同壁燈、牆身鋪石料，當中配搭石牆嘅小石磚，係特別造模鑄成，有金屬成份，每塊成本要成百幾蚊咁話。發展商擺咁多心思，都係希望令到買家有新鮮感同與眾不同嘅感覺，當然最終梗係想個盤賣個滿堂紅啦。
電訊盈科嘅薄扶林貝沙灣三期南灣，本來十六號晚乘搞活動時，做埋預留，但當晚臨時取消。日前蘭西收到代理致電訴苦，話發展商當晚畀咗個樓層同單位出嚟，叫啲客出價，價高者得，但要提供客戶姓名、出價、電話同畀支票做定金。
點知發展商轉個頭就call啲客，話十七號揀樓，直接同佢哋買重可以平啲，而代理嘅佣金梗係收唔到啦。
啲代理當日做一二期時，要上堂同考試至可以做買賣，第三期做預留前又要幫手做勢，當晚最慘重要俾雨淋，結果得個吉，靠佣金為生嘅代理，唔㷫就假嘞，所以打嚟投訴，宣洩不滿。代理打探之下，聽講話係發展商高層指示嚟喎。
近期大事宣傳嘅長沙灣宇晴軒二期，大賣歐洲主題，喺尖沙嘴港景峯商場售樓處地下，重搭咗個凱旋門裝飾，唔單止可收宣傳之效，重俾香港旅遊發展局睇中，喺五．一黃金周嗰陣，將呢個香港凱旋門列作景點㖭。
長實執行董事趙國雄重話，會配合旅發局，喺商場安排表演節目，重會提供飲食購物優惠，賣樓之餘，順便促進旅遊業，又可以帶旺個商場。
長實同南豐嘅將軍澳調景嶺站上蓋發展，𠵱家全速動工，隔籬維景灣畔業主梗係好留意啦！喺佢哋屋苑嘅網頁已經議論紛紛，主要係估吓長實會改個乜嘢名，有啲就純粹搞笑，有啲都幾認真㗎，好似係「調景嶺中心」、「調景嶺廣場」、「翠嶺豪峰」或者係「景嶺豪庭」，睇嚟長實可以上佢哋嘅網頁，睇吓啲建議，話唔定可以引發同事嘅創意，諗到一個重好嘅名都未定。
城規會上星期五修訂石硤尾分區計劃大綱圖，將電訊盈科喺偉智街四十一號嘅電話機樓，由住宅（甲類）用地，改為政府、機構或社區用地，用意只係反映現有土地𠵱家嘅用途啫。如果今次改用途最終冇人反對，咁第日電盈想拆咗機樓起住宅或商廈嘅話，就多咗一重關卡啦。何解？
皆因如果塊地重係住宅用地，咁電盈只要同地政總署傾改契同補地價，就可以起樓嘞。但𠵱家改咗土地用途，即係話佢哋要得到城規會同意、而又冇公眾人士反對，先至可以改番轉頭，再進入傾改契程序，你話幾煩。
而且電盈有失敗前科，申請改荔枝角月輪街機樓嚟起樓被城規會否決咗，所以，估計佢今次應該會誓守石硤尾塊地嘅住宅用途，提出意見，反對城規會嘅改劃。
蘭西
電郵地址：
