新劇登場姐仔行Catwalk熱身
李彩樺長腿大戰縮水王從希

胡杏兒、李彩樺、王從希和陳敏之等一班青春派女藝人，昨日為宣傳新劇《下一站彩虹》行天橋，雖然眾女藝員穿上短裙青春可人，但仍不及王從希的貼身lowcut搶鏡，不過，王從希因為怕走光而一度走錯位，影響表現。

為配合無綫新劇《下一站彩虹》今晚播出，無綫昨日特地安排劇中一班青春派演員，包括胡杏兒、李彩樺、王從希及陳敏之等，於荃灣愉景新城行catwalk宣傳。眾藝員昨日大都穿上七彩短裙行catwalk，更有女藝員在轉身時不慎露出打底褲，但論最搶鏡，還是身穿lowcut的王從希。

獲贊助減肥六磅
不過，王從希昨日行天橋時烏龍百出走錯位，事後她解釋說：「因為我怕走光，顧唔到咁多嘢，所以咪走錯位囉！」王從希指近日她獲張玉珊贊助減肥收身，由原來的一百零六磅減到現時的一百磅，問她可會擔心上圍縮水時，她笑說：「未度過，但都唔怕會走樣嘅！」

留意新一屆港姐
昨日李彩樺穿上短裙襯粉紅色絲襪，並沒有穿高跟鞋，令雙腿看來較其他女藝員粗壯，李彩樺不認同說：「唔係呀，角度問題啫！」而對於《下》海報中，胡杏兒站在中間位置，李彩樺則站在背後，李彩樺說：「冇所謂，最緊要角色好，第時出到街有人叫我劇中個名，我就好開心㗎啦。」
另外，胡杏兒指近日亦有留意新一屆港姐候選佳麗，感慨自己又老了一歲，而她又表示新劇若收視理想，定會請工作人員BBQ。