聽講利物浦季尾會大換血，但我求大俠就認為，梅菲應該可以逃過一劫。點解？之唔係因為佢係曼聯剋星囉！
計埋前晚嗰球十二碼，梅菲四季內第三次喺曼聯嘅奧脫福球場入波，兼且次次都做贏波功臣（利記三次都憑佢嘅入球贏一比○），咪話唔厲害。查實呢個波對佢本人實在好重要，事關證明咗佢係曼聯剋星之外，重分分鐘幫佢保住個飯碗。
梅菲今屆喺利記踢得麻麻，而佢喺對曼聯之前幾場波更加被貶做後備，所以亦有傳佢個名，喺利記領隊侯利亞份清洗名單上出現。
但係，家陣梅菲喺奧脫福大演「帽子戲法」，真係幫佢攞番唔少印象分，更何況佢呢個入球，對利記爭取下屆歐冠盃參賽資格，隨時有關鍵作用。或者你會覺得係梅菲時來運到，不過如果佢把握唔到，畀十個機會佢都冇用。
如果波圖攞到今屆歐冠盃冠軍，真係要多謝中游球隊利亞拿。事關利亞拿前晚喺主場贏咗士砵亭一比○之後，波圖亦宣布提早成為今屆葡超聯冠軍；𠵱家波圖少咗樣牽掛，咁即係話，佢哋全隊上下可以集中火力備戰下周中，作客對拉科魯尼亞嘅歐冠盃四強次回合比賽啦！
馬會喺呢個周末冇開荷蘭波，因為佢哋認為大局定已，分分鐘出現令人意想唔到嘅戰果。但其實，阿積士重未穩袋個聯賽錦標，而排第三、四位嘅飛燕諾同阿爾克馬爾，亦重有機會爭第二名以出席下屆歐冠盃外圍賽。既然荷甲聯重有競賽意義，馬會應考慮喺嚟緊周末開返荷蘭波。
曼城前晚作客打和李斯特城後，𠵱家喺英超聯榜排尾四；好彩列斯噚日輸俾樸茨茅夫，佢哋先冇被追貼。喺呢場波佢哋門將占士雖要為俾李城追嗰球負責，但話晒佢之後救咗迪哥夫嘅十二碼，將功抵過；聽聞曼城班球員為求護級成功，不斷加操，睇嚟佢哋要操多幾課至掂。
阿仙奴嘅法國國腳中場皮利斯日前鬧車路士嘅法國後衞迪西里同中場馬基列尼，話佢哋喺場上嘅不君子行為（向對手開踭同詐死令對手出場），破壞英超同法國國家隊嘅形象。話晒迪西里同馬基列尼係法國國腳同有頭有面，應以身作則，但竟然做埋啲咁嘅嘢，抵佢哋俾皮利斯鬧。