睇愛國報紙，發覺葉國華已成為抹黑對象，都有啲感慨。董特首上任之初，委任葉國華為顧問，處理台灣事務。為何如此，我哋唔知；葉國華有乜建樹，我哋唔知；二○○二年董特首連任，飛咗葉國華，原因係點，我哋更加唔知。董葉兩位嘅公事關係，由好到曳，其中歷史，值得後世考古。
今年一月《港人月刊》創刊號訪問葉國華講民主發展，葉國華好開通噃。港台搵葉國華上「自由風」訪問?做客座主持，發覺佢好識講嘢，叻過全部局長噃（叻過特首更唔使講），如此人才，竟然不能為董所用，可見特首嘅眼光。
最近葉國華對民主問題發表意見，愛國報紙立即引述「高人」消息，話老葉已經out咗，已無權威，其言不足信，明眼人一睇就知係一種discredit老葉嘅手法。近日愛國報紙更加話老葉飲飽愛國水，不甘寂寞，變成失意軍師，轉而做口水佬，多口論政，抬高自己聲勢咁話。咦，咁講法，老葉咪幾似九十年代嘅某位港英餘孽？
人走茶涼，老葉既然已有萬貫家財，背景又惹人疑忌，不如收口好過，以免變成另一個李子誦、金堯如；繼續做左派開明派嘅話，葉先生好易冇地企，俾僵硬土港批鬥抹黑。不過睇佢個相，又好似屬於硬頸一派，唔多似會腳軟口軟嗰類人，要砌低佢，都唔係咁易。選舉期近嘞，有心競選嘅民主派，望清楚自己嘅紀錄（例如有冇誤報學歷），日子會容易過啲。