唔少喺本港道路行駛嘅歐洲房車，大多數係德國車款，或多或少會與品牌效應有關；但張先生卻有不同見解，佢認為來自瑞典嘅紳寶9-5，除像德國車一樣耐用外，成熟嘅賣相亦係賣點之一。
記者、攝影：何永仁
張先生由於每日要往返市區，同埋常有家人同行關係，故此便要購買一部既穩定又舒適嘅房車作座駕，而紳寶9-5正好切合佢嘅要求：「雖然部車嘅賣相比唔上最時款嘅平治汽車，但勝在來得踏實穩重，睇位亦見方便容易；至於現時熱賣中嘅Facelifted新版，亦同樣來得成熟富品味㗎！」
「我曾駕駛過寶馬3系，可能由於自己個子高大，故此無論駕駛或鑽進後座充當乘客時，都會有點侷促感；但係9-5嘅車廂空間卻來得寬敞，除前排擁有闊落空間，令駕駛時更舒適外，後排亦擁有充裕空間，加埋承托力甚豐嘅皮椅，乘坐變得妥貼又舒服，就連坐過我車嘅親戚朋友都話正。」張先生笑着說。
另外，佢又認為車上一套冷氣系統響天氣炎熱嘅日子裏，仍可完全發揮其功效，為乘客帶來透心涼意。
至於駕駛感覺方面，張先生認為座駕所配用嘅一台2.0公升Turbo偈，由於擁有充裕動力輸出，因而令頭段起步加速暢順有力，就算在高速公路上需要「爬頭」，都可以應付自如。「不過，我最欣賞會係佢堅固嘅車架結構，喺多套安全帶及安全氣袋輔助下，絕能為乘客帶來安全嘅乘車環境；同時，車子亦一直沒有出現問題而要大修，從而證明咗紳寶汽車嘅耐用程度，不比其他同級對手遜色。」
引擎：1985cc直4DOHCTurbo
馬力：150ps/5500rpm
扭力：24.5kgm/1800rpm
0-100公里：11.6秒
極速：210km/h
當年車價：$268,800
查詢：福方汽車（25080000）
「雖然呢部9-5嘅表現，我會給予唔錯嘅評價，但隔音效果卻稍為遜色；而略高嘅耗油量，亦可算係車子嘅缺點之一。」