張學友與太太羅美薇由拍拖至結婚，二十年來經歷過幾許風雨，早前更有傳他與太太婚姻亮紅燈，學友坦言夫妻間早已過了火熱期，婚後亦時有吵架，但雙方只要堅守信念，便能維繫感情。
張學友和羅美薇（MayMay）九六年二月十五日於倫敦結婚，兩個月前，二人剛跨越七年之癢的期限，成功踏入第八個年頭，對於七年之癢這個關鍵期，學友淡然說：「唔關七年之癢事，我識啲朋友結婚十幾二十年一樣離婚，有啲三年、兩年、兩個月（離婚）都有，我都唔知呢句嘢係點樣嚟！」
學友和MayMay從拍拖到結婚已近二十年，兩個人要共對二十載實在不容易，但學友揚言他並沒維繫之道，夫妻間能夠一起，全憑大家的信念，他說：「我哋久唔久會嗌吓交，有時好啲，有時又冇咁好，最重要嘅係大家係咪諗住一齊，堅持住信念。
「啱啱識嘅時候，大家對大家好奇、新鮮，𠵱家唔係火熱，會改變，要一齊去維持呢段關係，唔係諗住郁啲你唔愛我、我唔愛你，愛好似好簡單，但所講嘅嘢其實好多！」
問學友與MayMay是否經常吵架？他說：「一段段時間啦，𠵱家少好多，中間嗰段時間會多啲，即係結咗婚第三、四年，到第六、七年又好啲。」現在，學友會以「幾自然」來形容他的婚姻生活。
家庭生活穩定快樂，所以學友對早前傳出他婚姻觸礁的報道甚感不滿，他說：「講我就冇乜所謂，自己做得呢行，但唔好影響到我家人，影響到我太太、父母，點解要咁呢？細路仔又要返學，會承受唔到㗎！」
學友談到三歲半的寶貝女張瑤華，即會心微笑，他說：「我惡㗎，會鬧、打佢patpat、打佢手板，但平日就我同佢玩，教同食物方面就係佢（MayMay），我朝朝都七點鐘起身車個女返學。」
學友是廿四孝爹哋，據聞他現在接戲有項新條件，就是有時間限制，以配合他湊女上學及放學的時間，學友解釋說：「我只係拍《金雞2》嗰陣時係咁，我平時慣咗要湊女返學放學，我客串套戲，話咗一日開四個鐘，都拍咗八、九日㗎，唔收錢梗係要就吓我啦，我拍《江湖》都冇咁要求，咪又係連拍幾晚通宵，自己湊唔到咪叫工人湊囉！」
