清明復活節期間，不少朋友出外旅行，其中賓架L好心水清，佢話：「我留意到曼谷、吉隆坡、香港三個機場之中，香港係最乾淨，地上全無垃圾。香港機場雖然係全球最佳，連續四年都係，但內裏好多選舉準則，我都不甚了了。但最直接一項，我就話以清潔嚟講，香港機場最好，我去勻歐美大機場，夠膽咁講。」
清潔乾淨，係機場管理目標之一，但知易行難，我都想屋企乾淨，但玻璃窗的玻璃好多灰塵，我唔願意抹嘅話，又何來乾淨？機管局管機場有一套，據賓架L嘅老友財務伍講：「我有一次出入機場，見到一個高佬西裝友彎低腰，喺地上執手巾紙，丟落垃圾桶，我望真吓，呢位就係機管局行政總裁彭定中博士。我以為彭博士偶然經過，見到地上有紙，就偶一為之，自己去執。後來同機管局的經理級老友講番，先知道機管局行政人員主動去機場執垃圾，雖然唔係既定政策，但彭博士以身作則，建立先例，每次巡機場時候，見到垃圾一定親自執。老細咁落力，其他高層豈敢怠慢。人人照辦煮碗，落到去基層清潔工，邊個敢偷懶呀，點好意思唔掃清晒的垃圾，等老細行過先至執呀，於是機場搞到乾乾淨淨。人係咁嘅，見到街角地上多垃圾，自己都掉埋一份；入到高貴酒店，窗明如鏡，點敢當眾出醜，隨地吐痰。就算係內地遊客，到咗赤鱲角機場，見到咁清潔，都唔好意思亂嚟呢！諗落彭定中言行合一，果然收效，可見保持清潔，係要做嘅唔係講嘅。