學友在樂壇奪盡大獎，在影壇方面，他於八八年憑《旺角卡門》的「烏蠅」一角奪「最佳男配角」，雖然前年及今年憑《男人四十》及《金雞2》提名影帝，但兩年均敗興而回，問學友想不想做影帝？他直言：「想呀，其實我今次《金雞2》算有交代啦，金像獎同金紫荊都有提名。影帝只係代表一部戲，但我拍戲都想有人認同嘅！」
學友花了三年心血製作廣東碟《Lifeislikeadream》，面對惡劣的唱片市道，學友做唱片有其不一樣的心態，他說：「我𠵱家出碟為開心，唔好話為樂壇，作為歌手唔出碟咁做乜呢？唔可以話只係拍戲囉。寫啲歌送畀人，純粹自己開心。」
學友拿着新碟的Demo碟，興奮地講述新碟上的歌曲全由自己與區丁玉監製，有幾首是自己填詞的作品，參與製作部份比以往任何一張碟都多，學友雀躍地說：「加埋主唱，我有二十五個名㗎，雖然市道唔好，但喺大家都唔敢預期太高嘅情況下，反而自由度大好多。
「𠵱家唱片業咁，歌手都有問題，掛住做idol（偶像），一出錄音室就唔唱得，出一、兩張碟又話拍戲，唱歌真係要畀心機唱㗎，做好歌手本份先啦，唔好只掛住拍戲。」
試問哪位歌手出碟不希望大賣？學友表示礙於客觀環境因素，故不會設下太高目標。他近來公開亮相，均會把握機會狠批下載mp3和買盜版的人，他說：「希望多啲人尊重歌手嘅心血，聽唱片啦，唔好download，唔好做傷天害理嘅嘢。我平時冇機會講，惟有出唱片宣傳時講多啲，講到大家都知download係好唔要面嘅行為，啲人知唔知醜㗎？」
採訪：朱倬誼、蔡如育
攝影：陳志嵐
