十九歲嘅水着少女若槻千夏一向都係玩開鄰家女孩嘅形象，但係勢估唔到佢嘅真實生活都真係咁平凡。最難得係佢完全唔介意，重拎晒影得佢一啲都唔靚嘅私人寫真出嚟，最好笑嘅係，原來若槻𠵱家住緊嘅房，啲牆重貼滿晒濱崎步、Morning娘、同埋叫外賣pizza嘅單張，都好簡陋啫！
不過若槻就一啲都唔怕醜，佢話步姐同Mo娘一向係佢嘅奮鬥目標喎！咁pizza唔係佢目標啦啩，點知又俾佢兜到喎，佢話：「咁我屋企附近搵間便利店都冇，有時有朋友嚟玩，咪叫pizza嚟招呼吓人囉！」呢樣嘢咪講明咗一個出道冇耐嘅女星，其實真係表面光鮮㗎咋，不過，好在若槻間房都算乾淨。
另外，若槻將佢細細個第一次着三點式，到拍處女寫真集而出國，由細到大嘅成長過程都公開晒，我羅拉認為佢雖然唔算好靚，但起碼可以證明，佢冇乜整過容同隆過胸，唔化妝都見得人㗎。
最好笑嘅，就係我羅拉發覺若槻喺佢細個《我的夢想》作文入面，話佢其中一樣最想做嘅事就係見到組合LondonBoots。咁啱佢緋聞男友田村淳就係呢個組合嘅成員，睇嚟若槻都已經夢想成真啦。