鄧健泓前晚喺銅鑼灣Joint15舉行「新居入伙」音樂派對，方力申、廖碧兒、袁潔瑩、陳穎妍和鍾麗淇都有嚟捧場，佢重搵嚟黃丹儀幫手伴奏，而蘇永康就做嘉賓。鄧健泓就好鬼high喇，又着住件印晒贊助商個名嘅Ｔ恤出場，認真hardsell。
不過，主辦單位前晚送出二百張入場券，又以一百八十蚊賣出一百張門票，可惜場地太過擠迫，大會為控制人流決定唔放咁多觀眾入場，令到二十幾位已購買門券嘅fans喺門外苦候，紛紛致電報館投訴；幾經擾攘後主辦單位惟有放班fans入去，但當其時音樂會已經過咗一半。
鄧健泓事後話：「應該中間有出錯，希望下次各樣順利啲。我都同媽咪講話太迫唔好嚟，而女友（原子鏸）就唔喺香港。」
發咗福嘅蘇永康最近被傳俾經理人黃柏高雪藏，但佢就否認有咁嘅事。至於張衛健話佢心情低落，蘇永康就話：「究竟乜嘢叫做低潮？冇飯開冇錢冇工作先係低潮，但我唔係囉。」蘇永康又話最近時勢好亂，𠵱家拍戲比較隱陣。
日前李宗盛同林憶蓮爆出離婚傳聞，而前晚李宗盛喺羅大佑演唱會唱《愛的代價》呢首歌時一直閉上眼，佢唱到「走吧，走吧，為自己的心找一個家，也曾傷心流淚，也曾黯然心碎，這是愛的代價。」唱完成首歌後佢突然唞大氣，似乎歌詞嘅意境就係𠵱家心情嘅寫照咁。睇嚟佢兩公婆就算未分開，都肯定係出咗好大問題。
關心妍噚日喺銅鑼灣舉行簽名會，她早前因為提供喺日本受訓嘅廣東話片段畀有線娛樂台播，結果上個月遭到無綫封殺，關心妍向記者透露話六月將會解封，對於同樣用廣東話接受有線訪問嘅陳奕迅，並未遭無綫封殺，關心妍就話不願置評。馮仁昭覺得，關心妍當然唔敢再講落去，唔通佢唔驚講多錯多咩？
無綫繼早排藝員部高層大執位之後，連《勁歌金曲》亦即將有變動，馮仁昭收到風，高級經理陳家揚稍後調番去綜藝科掌管所有音樂節目之餘，佢重會帶埋《K100》監製陳競游過檔，大概六月左右，陳競游就會代替賴偉棠做《勁歌》監製，所謂新人事新作風，到時《勁歌》又會有另一番景象。
Rosemary同李嘉慧噚日着晒性感婚紗，喺銅鑼灣出席一間美容院嘅擴張開幕活動，吳浩康同陳鍵鋒亦都有份扮新郎哥。Rosemary着嗰件係低胸low-cut婚紗，重嚇到得廿歲仔嘅吳浩康幾乎流鼻血咁滯，吳浩康話：「我唔敢四圍望，同佢講嘢都淨係望住佢對眼。」後生仔，果然係血氣方剛呀！
