環境運輸及工務局局長廖秀冬，噚日出席喺沙田新城巿廣場一樓舉行嘅「樂施音樂馬拉松2004」揭幕禮，佢重同著名鋼琴家羅乃新、資深音樂人倫永亮一齊表演三人六手聯奏鋼琴，演奏爵士名曲《BenodetBreeze》，三位喺台上邊彈邊笑非常融洽。彈奏之前冬冬同現場幾十位觀眾講，話自己當今次表演係綵排咁，可能佢唔想自己有太大壓力啦。
唔好睇佢哋輕輕鬆鬆，原來為咗噚日嘅表演，前晚倫永亮同羅乃新專程去咗冬冬屋企，苦練咗三粒鐘。倫永亮表演完之後同八方講：「廖局長好熱心，三個之中佢最忙，我哋收到樂譜之後要喺好短時間內練熟首曲，並唔容易，佢朝早開完會就即刻趕嚟同我哋綵排，廖局長為樂施會咁盡心盡力，我都覺得好感動。」
雖然倫永亮大讚廖局長，但當八方問佢畀廖局長嘅琴技幾多分，佢就冇畀滿分，「我畀佢有八十分，扣起嗰廿分係因為練習嘅時候，佢兩個（冬冬同羅乃新）好似大笑姑婆咁，一彈錯就笑，就算佢同羅乃新彈到蹺埋晒手都會笑㗎！」倫永亮又透露冬冬除咗識彈鋼琴，亦有拉中提琴，廖局長都有番咁上下音樂造詣噃。
（圖）（右起）倫永亮、羅乃新同廖秀冬組成嘅「六手琴師」，噚日為樂施會表演。陳亮華攝
傳真︰2623-9278
電郵︰