各界婦女聯合協進會搞咗個全國婦聯省區市婦聯主席赴港培訓及交流班，大會安排呢班三十幾位嘅內地代表，輪流同香港高官及各界別人士交流，佢哋噚日就同律政司司長梁愛詩食早餐，多位女高官包括環境運輸及工務局局長廖秀冬、民政事務局常任秘書長李麗娟、康樂及文化事務署署長王倩儀、民政事務總署署長陳甘美華同公務員事務局常任秘書長黎高穎怡等都有出席，咁啱噚日係梁司長六十五歲生日，大家一齊為佢慶祝。
班內地代表雖則嚟香港培訓，但行程都包括唔少觀光節目，包括去珍寶海鮮舫、青馬大橋、寶蓮寺、馬場、海洋公園同山頂夜景等等，最特別嘅係有一節「社交禮儀及個人形象塑造」，今日則全日自由活動，相信團員會把握機會購物，搞多幾團呢啲培訓班，香港各行各業都得益唔少。
（圖）女高官同內地婦女代表為梁愛詩（箭嘴示）慶祝生日。 馬泉崇攝
傳真︰2623-9278
電郵︰