港股連跌7日後，噚日終於吐氣揚眉，強力反彈216點，收報12383，成交161.54億元。美國新申領失業救濟人數減得冇預期咁多，加息步伐可能又拖慢，市場預期美股可能繼續反彈。不過，滙控（005）大班艾爾敦明言，美國加息寧早莫遲，呢番話實在值得留意，因為美國若任由經濟過熱，諗住大選過後才加息，可能為時已晚，到時才急速加息，可能導致泡沬爆破，肯定會更大鑊。
日本軟庫跟軟庫發展（648）分手後，仍對中港市場依依不捨，結果同滙富金融（188）聯手，再次進軍中港市場。滙富噚日停牌，等待公布發售新股消息，據聞會以每股0.30元發行3%股份畀日本軟庫，將會組成合營公司，協助日本企業及中國企業分別進軍兩地市場，兼且會提供投資銀行服務。呢個消息十分正面，相信滙富復牌後，股價將勁升。
黑客話，日本軟庫嘅舊愛軟庫發展，噚日亦隨大市上升6.1%，作為新歡嘅滙富，股價升至0.50元都嫌保守。
五一黃金周將至，本來消費零售旅旅股已蠢蠢欲動，點知北京、安徽證實兩宗沙士病例，兩宗疑似病例，而且重係關連個案，令人憂慮沙士在國內再爆發，搞到自由行概念股噚日斯人獨憔悴，早前部署大炒嘅炒家，今鋪認真頭痕。
速達（8263）噚日冇自動對盤成交，不過就有一宗大手成交上板，約6037萬股，每股作價0.45元，涉資2717萬元。據講有個主要股東將股份轉讓畀芬佬。
阿虎