甄妮噚日去新城接受薛家燕主持嘅《家天下》訪問，佢喺節目入面擺晒擂台，又講番寰宇集團年前發行佢嘅《有你有我演唱會》，到𠵱家重拖欠佢唱片分紅嘅事件，寰宇老闆娘林小明太太即刻應戰，話會喺下個禮拜舉行記者會，甄妮最好出嚟一齊對質，而會後佢哋會即刻採取法律行動，控告甄妮誹謗。
甄妮噚日喺節目度就話：「啲大公司、爭我斗零都係爭，係爭我錢咪認咗佢囉，如果我誤會你嘅，我咪saysorry囉。」甄妮自稱當年墊支咗四萬蚊做母帶，𠵱家就有人打電話嚟話同佢一人畀一半錢，佢話：「好乞兒啫，畀我二千萬、二十億，我就揸架勞斯萊斯嚟攞啦！」
甄妮又好唔滿意咁話𠵱家都唔知嗰張碟嘅銷量，佢一而再咁講：「正版賣一張，或者翻版翻咗一千張，你都要話畀我聽。」節目後佢重同記者講，話邊個人做盜版，大家心照喎。
而林太就強調母帶要片主自資製作費係全行皆知嘅規矩，寰宇唔單止幫甄妮畀咗一半錢即係二萬幾蚊，重畀咗八十八萬幾嘅版權費同三十萬嘅墊支費畀甄妮，但甄妮張DVD都冇賺過錢，林太話請記者代約甄妮對質，喺下個禮拜開記者會隨時賜教，記者會由寰宇畀錢，至於甄妮話想知翻版碟賣幾多，林太話：「我唔係神仙，叫佢問董建華啦！」
梁漢文（Edmond）噚日出席喺九龍塘舉行嘅活動，Edmond話做完呢個活動之後就會上船玩吓，重會同埋屋企人上去敍吓天倫咁話，問到佢女朋友去唔去，Edmond話：「佢唔得閒去，有嘢做。」
張栢芝同吳彥祖日前為新片《旺角黑夜》拍宣傳海報時，攝影師要求張栢芝做出悲傷嘅表情。
吳彥祖為咗幫栢芝投入拍攝，特別幫佢揀咗張悲情唱片俾佢聽，以培養情緒，唔知栢芝係咪太過入戲，結果聽咗一陣音樂就做出痛哭嘅表情，佢不停喺鏡頭前抽泣，一發不可收拾，拍完之後，栢芝重一個人匿埋喺房間一角平靜自己，收拾情緒。
霍震霆噚日喺九龍塘城大出席活動，最近佢個仔霍啟山同章子怡喺LV個派對上大跳辣身舞之後，即時成為傳媒嘅焦點，最新消息重話霍啟山買埋安全套同人過夜㖭，霍震霆被問到阿仔嘅問題顯得好避忌，重話：「佢係細路仔，你哋放過佢啦。」
倫永亮噚日到商台接受訪問，講到最近不停有消息話佢老友林憶蓮同老公李宗盛離婚，倫永亮話：「我絕對唔信，因為我每次見佢都聽到佢講生活好幸福，好享受𠵱家嘅生活，一啲都唔似有問題。」倫永亮重話：「我見過佢個女三次，但佢已經記得我，因為我教佢撩鼻屎，重叫佢食埋佢。」
Shine成員徐天佑日前喺台灣做做吓嘢突然暈倒，佢話自己暈倒嘅原因只係普通中暑，噚日佢接受商台電話訪問時話：「其實冇咁嚴重，因為之前上咗一個節目，喺舞蹈場度玩摔角，成身大汗之下就衝咗上車涼冷氣，跟住去咗餐廳，冷氣又咁啱壞咗，加上之前已經唔舒服，食食吓嘢鏡頭好似閃吓閃吓咁就暈咗。」
