提起投資物業，一般人即時會諗起買住宅或寫字樓收租，但市場其實有啲大家唔為意嘅另類冷門項目，例如大廈外牆廣告位。
新蒲崗八達街善美工業大廈嘅外牆廣告，𠵱家就推出市場畀大家買嚟自用或者出租嘞。廣告位高約170呎，闊50呎，即係由8樓到頂層25樓，業主重送埋十支射燈，等夜晚都咁突出。
嗰廣告位下個禮拜四拍賣，開價8萬。卓先地產聯席董事潘子明話，適合廣告公司同大機構用嚟做宣傳品牌之用。
呢個廣告位雖然零零舍舍高過前面嘅建築物，但要揸車經過至睇到，所以要搵租客都幾蝦人；不過，好在買大廈外牆廣告位唔使點維修保養，投資成本慳唔少㗎。
自從內地開放自由行，消費力強勁嘅內地旅客成為各大商場極力爭取嘅對象，地鐵商場亦趁五一黃金周送大禮吸客。今次送出3份大禮，包括響應母親節嘅親子禮物包，鼓勵多多消費嘅現金購物券，同足金金猴大抽獎，總值超過100萬元。
上述優惠只限內地客，但地鐵冇遺忘本地消費者，下月1日喺地鐵商場消費滿800蚊，可獲贈100蚊現金購物券，呢項優惠人人有份。
地鐵商場總商場市務經理陳嘉明話，雖然內地遊客佔總人流量不足5%，但人均消費比本地客高，平均每人每次使5000蚊，最重要嘅係帶動到整體消費氣氛。
房協末代夾屋將軍澳怡心園變身私樓出售，最近重不惜工本為屋苑增值，準備重售。今次想賣幾多單位、點樣賣、賣幾錢呎？房協話好快揭曉，叫大家唔使心急。
賣樓細節雖未透露，但房協做足準備工夫，喺屋苑停車場闢咗成萬呎地做售樓處，簽買賣合約嘅櫃枱長幾十呎，預足地方畀買樓人士簽單。唔通意味到時會人山人海，迫爆售樓處！
房協重好細心，喺售樓處特設一間兒童玩樂房，方便全家出動嘅父母可以放低小朋友去玩，安心買樓，認真照顧周到。
長沙灣宇晴軒2期以歐洲風格做主題，噚日售樓處同示範單位正式開幕，長實執行董事趙國雄揀咗個配合主題嘅造型出席，就係一身紅衣金鈕嘅法王路易十三打扮，加埋招牌太陽眼鏡，重有頂藍色羽毛帽，簡直殺盡全場。佢話因為鍾意飲路易十三，所以特登揀咗呢款造型。果然有taste，干邑極品路易十三都好貴啫！
為咗隆重其事，大會特別安排咗兩場舞蹈表演，其中一場就係法國肯肯舞，呢個開幕節目熱鬧香豔之餘，重緊扣歐洲主題；另外一場，就係由之前出現過嘅法國女郎，跳咗隻標準舞華爾滋，節目認真豐富。
蘭西
電郵地址：
