好股票果然唔怕大市波動，經紀黃剛話完ASM太平洋（522）可趁低吸納，股價噚日立即反彈6%，收35.20元，確係令小初喜出望外。
不過，經紀黃同時警告小初，話噚日大市大升二百幾點，唔排除係因為之前跌得太多，大戶平淡倉食胡所致，加上大陸又證實沙士重臨，都係小心為上。
講開好股票，德昌電機（179）雖然積弱多時，但小初見佢喺8元水平似乎有支持，所以諗住買番多少作長線投資，噚日正想付諸實行之際，好彩德昌早一步發出盈利警告，話全年盈利會下跌兩成幾。小初在失望之餘，但又暗覺好彩。
經紀黃話，其實睇番舊年銅鐵股嘅股價，幾乎隻隻升幅都以倍數計算，就應該諗到德昌會受影響，皆因呢兩樣都係生產摩打嘅主要原料，德昌股價長期受壓，亦主要係呢個原因。
近排上市公司如果有些少風吹草動，例如盈利倒退，班芬佬即刻非常大反應，馬上沽貨走人，所以德昌下周一開市，真係唔知會係乜嘢光景？
慕容小初