成立三年、一直蝕本嘅市區重建局，首任主席劉華森做埋今個月終於甩難，港府噚日宣布上市公司富聯國際行政總裁、SUNDAY聯席主席鄭維新，喺五月一號起接任。
鄭維新喺香港甚低調，佢兩位兄弟前中央政策組首席顧問鄭維健同前總商會主席鄭維志知名度比佢高得多，其中後者仍活動政商界。鄭氏家族係新加坡望族，喺當地有好多生意。
富聯國際主業係製衣，英國名牌男裝Gieves&Hawkes係業務之一，鄭家亦有做地產，公司叫永泰，九龍機鐵站上蓋漾日居係近年較大型項目。熟悉鄭家人士稱，鄭維新同田北俊、唐英年等紡織世家第二代相當友好，老董今次委以重任，佢日後喺政界行情看漲。
市建局中人對老董搵鄭維新接班頗為意外，有董事坦言其實「局內有合適人選」，李華明就指鄭維新有搞地產生意，日後要嚴格遵守利益申報制度；鄭維新透過市建局發聲明，話會「採取所有必須而恰當的措施，務求市建局維持高度誠信。」
（圖）鄭維新（左）家族又做製衣又做地產生意，佢同李唯仁（左二起）、陳啟宗、郭炳江都係朋友。
傳真︰2623-9278
電郵︰